Франция собиқ президентлари Олланд ва Саркози сайловда Макроннинг номзодини қўллаб-қувватламоқда

Франциянинг собиқ президенти, социалист Франcуа Олланд ватандошларини 24 апрель куни бўлиб ўтадиган президентлик сайловларининг иккинчи босқичида амалдаги президент Эммануэль Макрон учун овоз беришга чақирди.

«Мен бу ерда ахлоқдан дарс бериш ва французларга нима қилиши кераклигини ўргатиш учун турганим йўқ, лекин бу каби сайловларда Франция — асосий масала. Натижа муҳимлигини ҳисобга олиб, мен французларни Эммануэль Макронга овоз беришга чақираман»,— деди Олланд ТF1 телеканалида.

Унинг фикрича, Макроннинг иккинчи раунддаги рақиби ва миллатчи «Миллий уюшма» етакчиси Марин Ле Пеннинг ғалабаси «ўта хавфли» бўлади.

«Энг муҳими, Франция келажагимиз учун ўта хавфли бўлиши мумкин бўлган қўлларга тушмаслиги зарур», — деб тушунтирди Олланд ўз позициясини.

Аввалроқ Франциянинг яна бир собиқ президенти, ўнг марказчи Николя Саркози иккинчи турда Макронга овоз беришини айтган.

«Республикачиларнинг ҳуқуқий қадриятлари ва ҳокимиятдаги маданиятимизга содиқлик бизни Эммануэль Макроннинг бирликка чақирувига жавоб беришга ундаши керак», — деб ёзган Саркози ўз баёнотида.

10 апрелда Францияда президентлик сайловларининг биринчи тури бўлиб ўтган. Дастлабки тур натижаларига кўра амалдаги президенти Эммануэль Макрон 27,84 фоиз, Марин Ле Пен эса 23,15 фоиз овоз олган. Учинчи ўрин «Енгилмас Франция» партияси етакчиси Жан-Люк Меланшонга (21,95 фоиз) насиб қилган, қолган номзодлар эса 8 фоиз ва ундан кам овоз тўплаган.

Макрон ва Ле Пен сайловларнинг иккинчи турида иштирок этади ва у 24 апрелда ўтказилади.

Президентлик сайлови кампанияси вақтида Марин Ле Пен мамлакат раҳбарлигига сайланса, Францияни Европа Иттифоқи ҳамда НАТО аъзолигидан чиқаришни, шунингдек, евро рад этилиши, иккинчи фуқаролик бериш имкониятидан воз кечилишини ваъда берганди. Бироқ орадан ҳеч қанча вақт ўтмай, Ле Пен ушбу ваъдаларидан воз кечган.

Ўз баёнотларида Ле Пен Қримни ҳамон Россияники деб билишини таъкидлайди. Ле Пеннинг фикрича, тарихни қайта ёзиш мумкин эмас, чунки Қримда референдум ўтказилган. Президентликка номзоднинг аниқлик киритишича, Қрим авваллари Россияники бўлган ва одамлар Россия билан бирлашишга ўзлари қарор қилган.

Мария Ле Пен сайловларда ғалаба қозонган ва Россиянинг Донбассдаги «махсус операцияси» якунланган тақдирда, НАТОга Россия билан яқинлашишни таклиф қилмоқчи. У аввалроқ Россиянинг энергия манбаларига қарши санкцияларга қарши чиққан эди.