Бундан 110 йил аввал, 1912 йил 15 апрелда, «Титаник» кемаси айсбергга урилиб, чўкиб кетган. У 10 апрелда ўзининг илк ва сўнгги саёҳатини бошлаганди. Орадан тўрт кун ўтиб эса Атлантика океани тубига ғарқ бўлиб, 1500 нафардан ортиқ инсонни ҳаётдан олиб кетган. «Дарё» кема билан боғлиқ қизиқарли маълумотларни тақдим этади.
«Титаник» қурилиши вақтидаёқ саккиз нафар киши ҳалок бўлган
Улардан бор-йўғи беш нафарининг исм-шарифи маълум: Семюел Скотт, Жон Келли, Уильям Кларк, Жеймс Доббин ҳамда Роберт Мёрфи. 2012 йилда Белфастда уларнинг хотирасига тошлавҳа очилган.Ҳалокатдан сўнг атиги бир ой ўтиб, «Титаник» ҳақидаги биринчи фильм чиқади
«Омон қолган аёл» (Saved from the Titanic, 1912) номли ушбу картинада актриса Дороти Гибсон бош ролни ижро этган.Қизиғи шундаки, актриса чиндан ҳам омон қолган 700 нафар йўловчидан бири эди. У фильмда ҳатто кемада кийган кўйлак ва пойабзалида кўриниш беради.
Фильм муваффақиятли чиққанига қарамай, бугунги кунгача сақланиб қолмаган: ягона нусхаси ёнғинда куйиб кетган.
Учинчи класс йўловчилари учун атиги икки дона ванна ажратилганди
Уларга яратилган шароит ўртамиёна кемадагидан кўра яхшироқ бўлгани ҳақидаги фикрларга қарамай, аҳвол анча оғир бўлган. ABC News маълумотларига кўра, умумий сони 700 дан 1000 нафаргача етган ушбу йўловчилар бор-йўғи иккита ваннани ўзаро баҳам кўришга мажбур бўлган.Кема оркестри йўловчиларни тинчлантириш учун мусиқа ижро этган
Улар қаҳрамонлик кўрсатганди: BBC маълумотларига кўра, машшоқлар кема айсбергга урилганидан сўнг икки соат давомида мусиқа чалган.Кемада виолончел чалган Роже Брику эса яқин йилларгача расман вафот этганлар қаторида бўлмаган. Фалокат вақтида у бор-йўғи 21 ёшда эди. Оркестрнинг барча аъзолари кема чўккан санада ҳалок бўлганига қарамай, у фақат 2000 йилда фалокат қурбони сифатида қайд этилган. Француз қуролли кучлари уни ҳатто биринчи жаҳон урушида хизмат вазифасини бажара олмагани учун қочоқ деб эълон қилганди.
Кема кузатувчилари Фредерик Флит ва Режиналд Ли фалокатдан олдин дурбиндан фойдаланиш имкониятига эга бўлмаган
Дурбин кузатув мосламаси сақланадиган шкафда қолиб кетганди, ўша вақтда унинг калитини топишнинг иложи бўлмаган. Ушбу калит 2010 йилда кимошди савдосига қўйилган ва 130 минг доллардан кўпроққа сотилган.Орадан кўп йиллар ўтиб, қайсидир ҳазилкаш Фредерик Флит ҳайкали олдида дурбин билан қисқагина изоҳ қолдиради:
Кечир, юз йил кечикиб олиб келдим.Флит ҳалокатдан омон қолганига қарамай, 1965 йилда турмуш ўртоғи вафот этгач, ўз жонига қасд қилади.
Газеталар ҳалокат ҳақида нотўғри маълумот берган
The World ҳеч қандай қурбонлар ҳақида маълумот бермаган, Daily Mail ҳамма тирик қолгани ҳақида ёзган, Belfact Telegraph йўловчилар ҳаёти хавф остида эмаслигини айтган.New York Times фожиа тўғрисида аниқроқ маълумот берганди. У қуйидаги сарлавҳа остида мақола эълон қилган:«Титаник» айсбергга урилганидан сўнг тўрт соат ўтиб чўкиб кетди. 886 йўловчи «Карпатия» билан қутқариб қолинди, 1250 киши ҳалок бўлди.
«Титаник» ҳалокатидан омон қолган ҳамшира Вайолет Жессоп кейинроқ «Британник» кемаси ҳалокатидан ҳам тирик қолади
Жессоп «Титаник» чўккан вақтда 25 ёшда эди. Буйруққа кўра, у бошқа аёлларга қутқарув қайиғи хавфсиз эканлигини кўрсатиш учун унга ўтиради.Кейинроқ у «Британник» кемасида (ОАВ унга «Титаник 2» номини берган) ишлай бошлайди. Бироқ иккинчи кема ҳам сув остига ғарқ бўлади: у немис сувости кемаси қўйган мина билан тўқнаш келганди. Жессоп эса яна тирик қолади, лекин боши жиддий жароҳатланиб, бундан бутун умр азият чекиб ўтади.
Баъзи эркаклар қутқарув қайиғидан жой олиш учун аёллар кийимини кийиб олгани ҳақида гаплар юради
Шу миш-миш туфайли ҳатто 1916 йилда Диккинсон ва Ҳелен Бишоплар оиласи ажрашиб кетган. Бунга Диккинсоннинг аёллар кийимида қайиққа ўтиргани ҳақидаги гаплар сабаб бўлган.Бишоп ўзини аёл қилиб кўрсатишда айбланган ягона эркак бўлмаган. Жозеф Брюс Исмей, Уильям Картер, Уильям Слопер каби кишиларни ҳам бу миш-миш бир умр таъқиб қилган.
Кемадаги ошпазлардан бири Чарльз Жоуин кўп миқдорда виски ичганлиги туфайли сувда бошқаларга қараганда анча узоқроқ чидаб тура олган
Маълумотларга кўра, кема чўка бошлаган вақтда Жоуин икки шиша вискини ичиб юборади.Кейинчалик у Шимолий Атлантика океанининг муздай сувида камида икки соат чидаб берганини айтади — кўпчилик 15 дақиқа ҳам дош беролмай, ҳалок бўлган.
2030 йилгача «Титаник» кемасининг барча қолдиқлари йўқ бўлиб кетиши мумкин
Олимларнинг фикрига кўра, бактериялар кемани ўша вақтгача еб битиради.
Ижтимоий нотенглик
Маълумотларга қараганда, фожиа биринчи классдаги аёллардан тўрт нафарини бу дунёдан олиб кетган. Бу, албатта, қайғули ҳодиса. Лекин шу ҳодиса учинчи классдан 89 аёл ва 387 эркакнинг бошига етган.Биринчи классдаги аёллардан бирининг исми Энн Элизабет Ишем эди. У итини ўзи билан олиб кета олмаслигини билгач, қутқарув қайиғидан пастга сакрайди.
Тирик қолганлар ичида атиги бир киши япон миллатига мансуб бўлган
Масабуми Ҳосоно исмли бу инсон дастлаб Америка ОАВлари томонидан «япониялик омадли инсон» дея таърифланади. Бироқ орадан кўп ўтмай аёллар ва болалар учун мўлжалланган қайиққа чиқиб олгани учун қўрқоқ сифатида талқин қилина бошлайди. Уни ўз ватанида қайиққа ўтириш учун аёл қиёфасига кирган номуссиз эркак деб билишган.
1997 йилда «Титаник» фильми чиққанидан сўнг Ҳосонолар оиласи бир мактубни омма этиборига ҳавола этади. Унда Масабуми Ҳосоно ўз рафиқасига кема фалокати ҳақида ёзиб, ўлимга тайёр бўлганини, бироқ экипаж аъзоси қайиққа яна иккита одам кераклигини айтгач, унга тушиб олгани ҳақида маълум қилган.
«Титаник» қурилган ангар бугунги кунда суратга олиш майдончаси ҳисобланади
Мисол учун, «Тахтлар ўйини» (Game of thrones, 2011) сериали айнан ўша ерда суратга олинган.«Титаник» бунёд этилган Паинт Ҳалл ҳудуди Тitanic Studios таркибига киради. Ундан биринчи марта 2007 йили «Эмбер шаҳри» (City оf Ember, 2008) фильмини суратга олишда фойдаланилганди. Шундан бери у бир қанча телешоулар ва киноларни суратга олишда хизмат қилди.
Кемадан қолиб кетган омадли инсонлар
Газетачилар кема сув остига ғарқ бўлганидан бир неча кун ўтиб, унга чипта сотиб олган, лекин охирига етмаган саёҳатдан қолиб кетган кишилар рўйхатини туза бошлайди.Маълум бўлишича, Милтон Ҳерши, Жон Морган, Гуглиелмо Маркони каби бир нечта бахти кулган инсонлар кемага чипта сотиб олган, лекин баъзи сабаблар билан унга чиқиш фикридан қайтган.
Немислар ҳам «Титаник» ҳақида фильм суратга олган
Бир вақтлар фашист пропагандаси ҳам шу мазмунда фильм ишлаган. Фақат унда воқеалар Германия нуқтаи назаридан келиб чиқиб талқин қилинган.Аниқроғи, улар фожиада инглизларни айблайди. Сюжетга кўра, британияликлар йўловчилар ҳаёти учун қайғурган ягона немис офицерининг (тўқима образ) гапига қулоқ солмайди ва тезликни пасайтирмай ҳалокат сабабчисига айланади.
Изоҳ (0)