Франция президентлигига номзод, «Миллий бирлашув» ултраўнглар партияси етакчиси Марин Ле Пен мамлакатни НАТО бирлашган қўмондонлигидан чиқаришни ваъда берди, деб ёзмоқда Le Monde.
«Агар мени президентликка сайлашса, мамлакатни НАТО бирлашган қўмондонлиги ихтиёридан чиқараман, бироқ 5-модда, яъни Шимолий Атлантика альянсида мудофаа ҳамкорлигидан воз кечмайман», — деган Ле Пен матбуот анжуманида.
Номзод Франция қўшинлари бошқарувини НАТО бирлашган қўмондонлигига ҳам, келгусидаги Европа қўмондонлигига ҳам топширмаслигини таъкидлаган.
«Мен Франция 1966 йилдан 2009 йилгача олиб борган сиёсатга қайтмоқчиман», — деган Марин Ле Пен.
1966 йил июль ойида Франция НАТО ҳарбий ташкилотидан чиққан, лекин Шимолий Атлантика келишувининг сиёсий тузилмаси иштирокчиси бўлиб қолганди. Ушбу қарор президенти Шарл де Голл томонидан қабул қилинган, у Францияга «буюк етакчи мақоми»ни қайтаришни мақсад қилган, мустамлака муаммоларини ҳал этиш, ядро қуролини яратиш, АҚШга ҳарбий, иқтисодий ва молиявий томондан қарам бўлмасликка интилган. 2009 йилда Николя Саркози президентлиги даврида Франция альянснинг ҳарбий тузилмасига қайтган.
10 апрелда Францияда президентлик сайловларининг биринчи тури бўлиб ўтган. Дастлабки тур натижаларига кўра амалдаги президенти Эммануэль Макрон 27,84 фоиз, Марин Ле Пен эса 23,15 фоиз овоз олган. Учинчи ўрин «Енгилмас Франция» партияси етакчиси Жан-Люк Меланшонга (21,95 фоиз) насиб қилган, қолган номзодлар эса 8 фоиз ва ундан кам овоз тўплаган.
Макрон ва Ле Пен сайловларнинг иккинчи турида иштирок этади ва у 24 апрелда ўтказилади. Мазкур икки номзод 2017 йилда ҳам президентлик сайловларининг иккинчи турида ўзаро рақобатлашган. Беш йил аввал Макрон 66,10 фоиз овоз билан Ле Пендан устун келганди.
Изоҳ (0)