Буюк Британия бош вазири Борис Жонсон ва молия вазири Риши Сунак коронавирус чекловларини бузгани учун жаримага тортилди, деб хабар беради Reuters.
Британия бош вазири, унинг рафиқаси ва ғазначилик канцлери 2020 йилги локдаун вақтида ҳукумат муассасасидаги базмда иштирок этиб, карантин қоидаларини бузгани учун жарима белгилангани тўғрисида хабардор қилинган. Натижада Жонсон қонунни бузгани учун санкцияга учраган биринчи амалдаги Британия бош вазирига айланди.
Уларнинг учаласи ҳам кечирим сўраган, бироқ бош вазир Жонсон ва канцлер Сунак мухолиф сиёсатчиларнинг истеъфо бериш тўғрисидаги чақириқларини рад этган.
«Бош вазир ва ғазначилик канцлери бугун пойтахт полициясининг уларга жарима белгилангани тўғрисидаги хабарномасини олди. Батафсил маълумотлар йўқ, аммо улар пайдо бўлиши билан сизларга маълум қиламиз», — дейди Жонсоннинг вакили.
Жарималар Лондон полицияси томонидан карантин вақтида Даунинг-стрит ва бошқа ҳукумат биноларида ўтказилган 12 та тадбир бўйича ўтказилаётган тергов доирасида белгиланган. Тергов якунлари бўйича 50 дан ортиқ жарима ёзилган.
Таъкидлаш керакки, Британия сиёсий элитаси коронавирус пандемияси вақтида бир Partygate номини олган бир нечта базмларда иштирок этган. Полиция маълумотларига кўра, Жонсон бу каби тадбирларнинг камида олтитасида қатнашган.
Эслатиб ўтамиз, бундан олдин ниқоб тақмаган Бразилия президенти, ниқобни нотўғри таққан Чехия собиқ президенти, мажлисда тиббий ниқобсиз қатнашган Таиланд бош вазири жаримага тортилган эди.
Изоҳ (0)