Германия Федератив Республикаси президенти Франк-Вальтер Штайнмайер шу ҳафтада Украинага расмий ташриф билан боришни режалаштирганди, бироқ Украина давлат раҳбари Владимир Зеленский уни қабул қилишдан бош тортди. Бу ҳақда Bild нашри хабар берган.
Зеленскийнинг учрашувни рад қилишига Штайнмайернинг сўнгги йилларда Россия билан яқин алоқада эканлиги, жумладан, «Шимолий оқим—2» газ қувурининг қурилишини қўллаб-қувватлагани сабаб бўлган.
«Ҳаммамиз Штайнмайернинг Россия билан яқин муносабатда эканини, барчаси унинг формуласида ҳам мужассам бўлиб турганини биламиз. Ҳозир уни Киевда кўриб хурсанд бўлишмайди», — дея газетага ахборот берган исмини ошкор этмаган украиналик дипломат.
Германия Федератив Республикаси президенти ҳам Киевда уни кўрмоқчи эмасликларини тасдиқлаган.
«Польшалик ҳамкасбим (Польша президенти Анжей Дуда) Европа бирдамлигини намойиш қилиш учун Эстония, Литва ва Латвия президентлари билан биргаликда Киевга боришимизни таклиф этганди. Мен у ерга боришга тайёр эдим, бироқ Украина ҳукумати менинг Киевга боришимни истамаяпти», — деган у немис телеканалларидан бирига берган интервьюсида («ТАСС» иқтибоси).
Франк-Вальтер Штайнмайер 2017 йилдан бери ГФР президенти лавозимида фаолият юритиб келмоқда. 2005—2009 ҳамда 2013—2017 йилларда у мамлакат ташқи ишлар вазири лавозимида ишлаган. Россия Украинага бостириб кирганидан кейин Штайнмайер Москва билан сиёсатдаги хатоларини тан олган, хусусан, «Шимолий оқим—2» лойиҳасини қўллаб-қувватлаш бўйича ташаббуслари ҳам хато эканини билдирганди.
Украинанинг Буча шаҳридаги воқеалардан кейин бир қатор Ғарб сиёсатчилари: Еврокомиссия раиси Урсула фон дер Ляйен, Евроиттифоқнинг ташқи ишлар масалалари бўйича олий вакили Жозеп Боррел, шунингдек, Австрия канцлери Карл Нехаммер мамлакатга келган. Буюк Британия бош вазири Борис Жонсон Киевга ташриф буюрган ва Зеленский билан музокаралар олиб борганди.
Изоҳ (0)