Украина президенти Владимир Зеленский Россияга ҳибсга олинган «Мухолифат платформаси — Ҳаёт учун» партияси раҳбари Виктор Медведчукни асирдаги украин йигит-қизларига алмашишни таклиф қилди. Бу борадаги мурожаат Украина етакчисининг Telegram каналида пайдо бўлган.
«Мен унинг ҳарбий камуфляждан фойдаланишини, айниқса, орсизлик деб биламан. Шу орқали маскировга қилмоқчи бўлган. Мана шундай ‘жангчи’. Мана шундай ‘ватанпарвар’. Демак, Медведчук ўзига ҳарбий формани танлаган бўлса, у ҳарбий давр қоидаларига бўйсунади», — деб ёзади Зеленский.
Унинг сўзларига кўра, Медведчук «48 кун яширинган», шунда сўнг Украина чегарасини кесиб ўтмоқчи бўлган. Зеленский ҳарбийлар ва ҳуқуқ-тартибот органлари ходимларини Медведчукни алмашиш имкониятини кўриб чиқишга чақирган.
Аввалроқ Владимир Зеленский уруш бошида уй қамоғидан қочиб кетган «Путиннинг қадрдони» Медведчукнинг ҳибсга олинганини маълум қилганди. «Украина хавфсизлик хизмати махсус операцияни муваффақиятли бажарди, баракалла», — деб ёзган Украина президенти. Зеленский Медведчукнинг қандай қўлга туширилгани юзасидан тафсилотларни кейинроқ ошкор этишини билдирган. Украина хавфсизлик хизмати ҳам ҳибсга олинган сиёсатчи фотосуратини тармоққа юклаган.
Россия президентининг матбуот котиби Дмитрий Песков Медведчукнинг Киевда ҳибсга олингани ҳақидаги ахборотни тасдиқламаган. «Мазкур хабарнинг қайд даражада ҳаққонийлиги юзасидан аниқ бир нима айта олмайман. Тасдиқлайдиган ахборотларсиз нимадир дейиш қийин… Украинада фейк хабарлар шу даражада кўп, уларнинг сони мамлакатда қандай сараланаётганига ҳам шубҳам бор», — деган у.
Виктор Медведчук Украинадаги Россия тарафдори бўлган энг обрўли сиёсатчилардан бири ҳисобланарди. ОАВда уни Россия президенти Владимир Путиннинг «қадрдони» деб ҳам аташган. 2019 йилда Медведчукга нисбатан давлатга хиёнат бўйича иш қайта бошланган, бироқ жараён судгача етиб бормасдан ёпилганди.
Изоҳ (0)