Ўзбекистонда 2022 йил 25 январь куни содир бўлган электр таъминотидаги йирик миқёсли узилиш бўйича ҳукумат комиссияси хулоса беради. Бу ҳақда 12 апрель куни АОКАда ўтказилган матбуот анжуманида «Ҳудудий электр тармоқлари» АЖ бош бошқармаси бошлиғи ўринбосари Улуғбек Ҳакимов маълум қилди, дея хабар бермоқда «Дарё» мухбири.
Улуғбек Ҳакимовнинг айтишича, электр энергияси таъминотидаги узилишга тизимдаги тармоқлар эскиргани таъсир кўрсатган.
«25 январдаги блекаут барча энергетиклар учун синовли бўлди. Бунда асосий ишлаб чиқарувчи ва электр энергияси тарқатувчи тармоқларимизнинг аксарият қисми 60—80 йилларда ишга туширилгани ўз таъсирини кўрсатди. Қўшни давлатлар билан 220 ва 500 волт кучланишли тармоқлар орқали боғлиқмиз ва параллел равишда, ягона энергетика тизимида ишлаймиз. Қайси ҳудудда бундай ҳолат юзага келгани ҳақида ахборот бермоқчи эмасман. Чунки бу ҳақда ҳукумат комиссияси йиғилиш ўтказиб, хулосаларини беради. Бу воқеа юз бергач, албатта, ўзимизнинг тизим учун катта хулосаларга келдик», — деди ташкилот вакили.
Анжуманда Улуғбек Ҳакимов блекаутдан кейин тизимда нималарга эътибор қаратилиши зарурлигига ҳам тўхталди.
«Блекаутда мутахассисларимиз малакасини ошириш, жойларда тезкор техник тадбирларни ўтказиш, ишлаб чиқариш қувватларини биринчи навбатда тоифалашган, яъни шифохоналар ва бошқа объектларни электр энергияси билан таъминлашга йўналтириш муҳимлиги намоён бўлди. Шунингдек, муқобил (қуёш, шамол) электр манбаларини ишлаб чиқаришни жадаллаштириш зарурлиги ҳам яққол кўриниб қолди. Захира таъминот манбаларини яратиш ҳам муҳим аҳамиятга эга. Чунки бундай узилишлар бир онда содир бўлади. Айниқса, тоифалашган объектларда қайта тикланувчи энергияда ишлайдиган ускуналарни кенгроқ жорий этишимиз керак», — деди мутахассис.
Аввалроқ Энергетика вазири ўринбосари Шерзод Хўжаев Ўзбекистон бўйлаб рўй берган электр таъминотидаги узилиш сабаблари ҳозир ҳам ўрганилаётганини айтганди.
Изоҳ (0)