Сирдарё вилояти Гулистон шаҳридаги мактабда ўқувчининг яқинлари ўқитувчи ва мактаб директори ўринбосарини калтаклагани айтилди. Бу ҳақда «Дарё» манбаси хабар берди.
Вилоятнинг Гулистон шаҳридаги 5-сонли умумтаълим мактабида бўлиб ўтгани айтилган жанжалга ўқувчининг мактабга кечикиб келгани ва ўқитувчининг унга танбеҳ бергани сабаб қилиб кўрсатилмоқда.«Ўқитувчи дарсга кечикиб келган ўқувчидан нимага тартибга риоя қилмаётгани тўғрисида сўраган, эвазига эса ундан ҳақоратли сўзлар эшитган. Ўқитувчи шунда ҳам босиқлик қилиб, бу ҳақда директор ўринбосарига хабар берган. Директор ўринбосари ўқувчига бундай ҳолат яхши эмаслигини тушунтирмоқчи бўлганида ўқувчи уни ҳам ҳақоратлаб уйига кетиб қолган. Бироздан сўнг муштумзўрларни олиб келиб, мактаб биносида дастлаб ўқитувчини, сўнгра уни ҳимоя қилмоқчи бўлган директор ўринбосарини аёвсиз калтаклашган. Ҳозирда ўқитувчи ва директор ўринбосарига Республика шошилинч тиббий ёрдам илмий маркази Сирдарё вилояти филиалида тиббий ёрдам кўрсатилмоқда», — дейди бу ҳақда «Дарё» манбаси.
«Дарё» сўровига жавоб берган Сирдарё вилоят ИИБ ахборот хизмати раҳбари Достон Шамсиддинов воқеа 2022 йил 8 апрель куни содир бўлганини тасдиқлаб, ҳолат ИИБ назоратига олинганини, суриштирув ишлари давом этаётганини маълум қилди.
Сирдарё вилояти халқ таълими бошқармаси ахборот хизмати воқеага ўқувчининг кечикиб келиши сабаб бўлганини тасдиқлаб, оқибатда ўқувчи У.А. ҳамда ўқитувчи Н.Ғ ўртасида ўзаро келишмовчилик юзага келганини маълум қилди.
«Ҳолатдан хабар топган ўқувчи У.А.нинг оила аъзолари мактаб биносига келиб, мактаб маъмурияти билан жанжаллашган. Натижада эса директорнинг ўқув ишлари бўйича ўринбосари М.Ю. ҳушини йўқотган ва Гулистон шаҳар шошилинч тез-тиббий ёрдам марказига жойлаштирилган», — дейди вилоят халқ таълими бошқармаси ахборот хизмати раҳбари.
Қўшимча қилинишича, мазкур воқеадан сўнг Гулистон шаҳри ҳокими Тўлқинжон Дадабоев 5-умумтаълим мактабида бўлиб, мактабларда ижтимоий-маънавий муҳитни соғломлаштириш ҳамда вояга етмаган ўқувчилар ўртасида жиноятчилик ва ҳуқуқбузарликни олдини олиш бўйича йиғилиш ўтказилган. Тадбирда сектор раҳбарлари, ҳоким ўринбосарлари, шаҳар умумтаълим мактаби директорлари ва уларнинг маънавий маърифий ишлар бўйича ўринбосарлари иштирок этган.
Йиғилишда Гулистон шаҳар халқ таълими бўлими мудири Самандар Ортиқовга ҳар бир умумтаълим мактаблари педагог жамоаси билан учрашувлар ташкил этиш бўйича режа-жадвал ишлаб чиқиш вазифаси топширилган.
Изоҳ (0)