Red Wings авиакомпанияси илк бор Махачқалъа ва Урганч ўртасида тўғридан-тўғри рейсларни йўлга қўяди. Биринчи парвоз 26 апрель кунига режалаштирилган. Бу ҳақда Махачқалъа аэропорти матбуот хизматига таяниб, «ТАСС» хабар берди.
«Red Wings авиакомпанияси Махачқалъа ва Ўзбекистоннинг Урганч шаҳри ўртасида рейсларни йўлга қўяди. Доғистон пойтахтидан амалга ошириладиган биринчи парвоз 26 апрелга режалаштирилган. Рейслар ҳар ҳафта Sukhoi Superjet 100 самолётлари орқали амалга оширилади», — дейилади хабарда.
Матбуот хизмати маълумотларига кўра, Махачқалъадан парвоз ҳафтанинг сешанба кунлари амалга оширилади, парвоз давомийлиги 1 соат 55 дақиқа. Урганчдан қайтиш рейси эса чоршанба кунга режалаштирилган, парвоз давомийлиги 2 соат 15 дақиқа.
Таъкидланишича, айни вақтда компаниялар Махачқалъадан Тошкент, Бухоро ва Наманган шаҳарларига парвозларни амалга ошириб келмоқда.
Махачқалъа аэропорти — Доғистонда ягона бўлиб, 2014 йилда унинг учиш-қўниш йўлаги реконструкция қилинган. Аэропортнинг ички рейслардаги ўтказувчанлик қобилияти соатига 200 йўловчини, халқарода эса 60 йўловчини ташкил этади. У ердан Москва, Санкт-Петербург, Нижний Новгород, Екатеринбург, Сочи, Минералние води, Сургут, Челябинск, Қозон, Новосибирск, Новий Уренгой, Қозоғистон, БАА ва Туркияга рейслар амалга оширилади.
Изоҳ (0)