2022 йилнинг апрель—май ойларида республиканинг 202 та таълим муассасасида PISA тадқиқотининг тажриба-синовларини ўтказишга тайёргарлик кўрилмоқда. Бу ҳақда 11 апрель куни «Таълимдаги халқаро тадқиқотларнинг Янги Ўзбекистон тараққиётидаги ўрни» мавзусидаги халқаро анжуманда таъкидланди, деб хабар бермоқда «Дарё» мухбири.
Маълум қилинишича, ўтган давр мобайнида Иқтисодий ҳамкорлик ва тараққиёт ташкилоти (OECD) ҳамда Таълимдаги ютуқларни баҳолаш халқаро ассоциацияси (ИЭА) билан келишувларга эришилиб, Ўзбекистон илк маротаба PISA, TALIS, PIRLS ва TIMSS халқаро дастурларида иштирок этмоқда.
2021 йилда республиканинг 83 та мактабларида PISA тадқиқотининг тажриба-синовлари ўтказилган. Эндиликда танлаб олинган 202 та таълим муассасасида 2022 йилнинг апрель—май ойларида асосий синов жараёнларини ўтказишга тайёргарлик кўрилмоқда.
Бугунги кунга қадар халқаро тадқиқотларга тайёргарлик бўйича 14 та ҳудудда 348 та таянч мактаб белгиланиб, бошқа 9691 та мактаб ушбу таянч мактабларига бириктирилган.
Шунингдек, Миллий марказ томонидан махсус тренинглар ташкил этилиб, 477 нафар мутахассис (тест администраторлари, сифат назоратчилари ва баҳоловчилар) ҳамда 795 нафар мактаб координатори мақсадли тайёрланган.
2019—2021 йилларда халқаро тадқиқотлар доирасида тажриба ва асосий синовлари ташкил этилиб, уларда 1119 та мактабда таълим олаётган 35729 нафар ўқувчи ҳамда 3292 нафар ўқитувчи, 591 нафар мактаб директори ва 7264 нафар ота-оналарнинг сўровномаларда иштироки таъминланган.
Таълим инспекцияси ҳузуридаги таълим сифатини баҳолаш бўйича халқаро тадқиқотларни амалга ошириш миллий маркази директор ўринбосари Хуршид Аҳмедов ушбу конференция юзасидан ўз фикрларини билдирди.
Бугунги халқаро илмий-амалий конференцияни ташкил этишда бевосита Иқтисодий ҳамкорлик ва тараққиёт ташкилоти, ЮНЕСКО, ЮНИСЕФ, Жаҳон банки билан яқиндан ҳамкорлик асосида ушбу халқаро илмий-амалий конференция ташкил этилган. Шунингдек, конференцияга Иқтисодий ҳамкорлик ва тараққиёт ташкилоти бош котибининг таълим сиёсати бўйича махсус маслаҳатчиси, PISA тадқиқоти асосчиси Андреас Шляйхер, қолаверса, таълим кўникмалари департаментининг директори ҳам ташриф буюрган. Шу инсоннинг бугунги конференцияга ташриф буюришининг рамзий маънода Ўзбекистонни PISA халқаро баҳолаш дастурларини асосий синовида иштирок этиш учун очилиш деб айтишимиз мумкин.Ушбу халқаро баҳолаш дастурларида Ўзбекистоннинг иштирок этиши нима мақсад этиб белгиланган? Айтишимиз мумкинки, ўзбекистонлик ўқувчилар илк маротаба халқаро тадқиқотда иштирок этиб турибди. Яъни ўқувчиларимизнинг ўқиш, математик, табиий ва илмий фанлар саводхонлиги бўйича билимлари синалади. Қолаверса, бу йилги циклда янги йўналиш сифатида креатив фикрлаш ҳам қўшилган. Яъни ўқувчиларимиз бевосита креатив фикрлаш бўйича ўзларининг мантиқий кўникмаларини синаб олади.
Ушбу халқаро баҳолаш дастурларида Ўзбекистоннинг иштирок этиши нима беради? Айтишимиз мумкинки, биринчи навбатда ўқувчиларимизнинг халқаро майдонда ўз тенгдошлари билан солиштириш. Бундан ташқари, ушбу халқаро баҳолаш дастурларида Ўзбекистоннинг ҳам рейтингда бўлиши. Қарийб 90 га яқин мамлакат ичида Ўзбекистон бу йили ушбу тадқиқотда иштирок этса, 2023 йилнинг декабрь ойида натижалар эълон қилинади. Ўз навбатида бизнинг рейтинг ҳам дунё мамлакатлари орасида кўринади. Қолаверса, бу рейтинглардан мақсадимиз Ўзбекистонга инвестиция жозибадорлигини ошириш. Бизнинг натижалар эълон қилиниб, халқаро майдонда кўрингандан кейин ўз навбатида хорижий молиявий ташкилотлар томонидан инвестиция оқимини ошишига олиб келади.
Хуршид Аҳмедов, Таълим инспекцияси ҳузуридаги таълим сифатини баҳолаш бўйича халқаро тадқиқотларни амалга ошириш миллий маркази директор ўринбосари
Изоҳ (0)