2022-yilning aprel—may oylarida respublikaning 202 ta ta’lim muassasasida PISA tadqiqotining tajriba-sinovlarini o‘tkazishga tayyorgarlik ko‘rilmoqda. Bu haqda 11-aprel kuni “Ta’limdagi xalqaro tadqiqotlarning Yangi O‘zbekiston taraqqiyotidagi o‘rni” mavzusidagi xalqaro anjumanda ta’kidlandi, deb xabar bermoqda “Daryo” muxbiri.
Ma’lum qilinishicha, o‘tgan davr mobaynida Iqtisodiy hamkorlik va taraqqiyot tashkiloti (OECD) hamda Ta’limdagi yutuqlarni baholash xalqaro assotsiatsiyasi (IEA) bilan kelishuvlarga erishilib, O‘zbekiston ilk marotaba PISA, TALIS, PIRLS va TIMSS xalqaro dasturlarida ishtirok etmoqda.
2021-yilda respublikaning 83 ta maktablarida PISA tadqiqotining tajriba-sinovlari o‘tkazilgan. Endilikda tanlab olingan 202 ta ta’lim muassasasida 2022-yilning aprel—may oylarida asosiy sinov jarayonlarini o‘tkazishga tayyorgarlik ko‘rilmoqda.
Bugungi kunga qadar xalqaro tadqiqotlarga tayyorgarlik bo‘yicha 14 ta hududda 348 ta tayanch maktab belgilanib, boshqa 9691 ta maktab ushbu tayanch maktablariga biriktirilgan.
Shuningdek, Milliy markaz tomonidan maxsus treninglar tashkil etilib, 477 nafar mutaxassis (test administratorlari, sifat nazoratchilari va baholovchilar) hamda 795 nafar maktab koordinatori maqsadli tayyorlangan.
2019—2021-yillarda xalqaro tadqiqotlar doirasida tajriba va asosiy sinovlari tashkil etilib, ularda 1119 ta maktabda ta’lim olayotgan 35729 nafar o‘quvchi hamda 3292 nafar o‘qituvchi, 591 nafar maktab direktori va 7264 nafar ota-onalarning so‘rovnomalarda ishtiroki ta’minlangan.
Ta’lim inspeksiyasi huzuridagi ta’lim sifatini baholash bo‘yicha xalqaro tadqiqotlarni amalga oshirish milliy markazi direktor o‘rinbosari Xurshid Ahmedov ushbu konferensiya yuzasidan o‘z fikrlarini bildirdi.
Bugungi xalqaro ilmiy-amaliy konferensiyani tashkil etishda bevosita Iqtisodiy hamkorlik va taraqqiyot tashkiloti, YUNESKO, YUNISEF, Jahon banki bilan yaqindan hamkorlik asosida ushbu xalqaro ilmiy-amaliy konferensiya tashkil etilgan. Shuningdek, konferensiyaga Iqtisodiy hamkorlik va taraqqiyot tashkiloti bosh kotibining ta’lim siyosati bo‘yicha maxsus maslahatchisi, PISA tadqiqoti asoschisi Andreas Shlyayxer, qolaversa, ta’lim ko‘nikmalari departamentining direktori ham tashrif buyurgan. Shu insonning bugungi konferensiyaga tashrif buyurishining ramziy ma’noda O‘zbekistonni PISA xalqaro baholash dasturlarini asosiy sinovida ishtirok etish uchun ochilish deb aytishimiz mumkin.Ushbu xalqaro baholash dasturlarida O‘zbekistonning ishtirok etishi nima maqsad etib belgilangan? Aytishimiz mumkinki, o‘zbekistonlik o‘quvchilar ilk marotaba xalqaro tadqiqotda ishtirok etib turibdi. Ya’ni o‘quvchilarimizning o‘qish, matematik, tabiiy va ilmiy fanlar savodxonligi bo‘yicha bilimlari sinaladi. Qolaversa, bu yilgi siklda yangi yo‘nalish sifatida kreativ fikrlash ham qo‘shilgan. Ya’ni o‘quvchilarimiz bevosita kreativ fikrlash bo‘yicha o‘zlarining mantiqiy ko‘nikmalarini sinab oladi.
Ushbu xalqaro baholash dasturlarida O‘zbekistonning ishtirok etishi nima beradi? Aytishimiz mumkinki, birinchi navbatda o‘quvchilarimizning xalqaro maydonda o‘z tengdoshlari bilan solishtirish. Bundan tashqari, ushbu xalqaro baholash dasturlarida O‘zbekistonning ham reytingda bo‘lishi. Qariyb 90 ga yaqin mamlakat ichida O‘zbekiston bu yili ushbu tadqiqotda ishtirok etsa, 2023-yilning dekabr oyida natijalar e’lon qilinadi. O‘z navbatida bizning reyting ham dunyo mamlakatlari orasida ko‘rinadi. Qolaversa, bu reytinglardan maqsadimiz O‘zbekistonga investitsiya jozibadorligini oshirish. Bizning natijalar e’lon qilinib, xalqaro maydonda ko‘ringandan keyin o‘z navbatida xorijiy moliyaviy tashkilotlar tomonidan investitsiya oqimini oshishiga olib keladi.
Xurshid Ahmedov, Ta’lim inspeksiyasi huzuridagi ta’lim sifatini baholash bo‘yicha xalqaro tadqiqotlarni amalga oshirish milliy markazi direktor o‘rinbosari
Izoh (0)