Афғонистон мамлакат темир йўлларини бошқариш бўйича шартномаларни қайта кўриб чиқишни режалаштирмоқда. Бу ҳақда Ariana News хабарига кўра, Афғонистон темир йўл бошқармаси (АRА) директори Бахт ул-Раҳмон Шарафат маълум қилган.
Унинг сўзларига кўра, бу шартномалар мамлакат манфаатлари ҳисобга олинмаган ҳолда тузилган ва ҳозирда ҳар йили миллионлаб долларлар хорижий компанияларга кетиб қолмоқда.
Юкларимизнинг катта қисмини олиб ўтадиган Ҳайратон портига олиб борувчи йўл йилига 18 миллион долларга Ўзбекистон компанияси томонидан бошқарилади. Афғон компаниялари буни анча арзонроқ қилишга тайёр, — деди Шарафат.
Шу муносабат билан АRА раҳбарияти ҳозирда мамлакат темир йўлларини бошқаришни маҳаллий компанияларга топшириш режаси устида ишламоқда.
Йўлни «Ўзбекистон темир йўллари» бошқариб келади
Ҳайратон—Мозори Шариф йўли 2010 йилда фойдаланишга топширилган. Лойиҳа «Ўзбекистон темир йўллари» томонидан Осиё тараққиёт банки гранти (165 миллион доллар) ва Афғонистон ҳукуматининг ўз маблағлари (15 миллион доллар) ҳисобидан амалга оширилган.
Бу «Ўзбекистон темир йўллари»нинг биринчи хорижий лойиҳаси эди. У Афғонистоннинг Ўзбекистон билан чегарасидаги Ҳайратон вокзалидан Мозори Шариф шаҳригача бўлган янги бир йўлли темир йўл линиясини қуриш, Ҳайратондаги темир йўл вокзалини модернизация қилишни ўз ичига олган эди.
Йўлнинг умумий узунлиги 106 километрни ташкил этди. Ҳозирда «Ўзбекистон темир йўллари» томонидан бошқарилади.
Афғонистон импортининг қарийб ярми, шунингдек, гуманитар юкларнинг салмоқли қисми Ҳайратон порти орқали ўтади. Бу темир йўлнинг фойдаланишга топширилиши юк ташиш ҳажмини сезиларли даражада оширган эди.
Изоҳ (0)