Afg‘oniston mamlakat temiryo‘llarini boshqarish bo‘yicha shartnomalarni qayta ko‘rib chiqishni rejalashtirmoqda. Bu haqda Ariana News xabariga ko‘ra, Afg‘oniston temiryo‘l boshqarmasi (ARA) direktori Baxt ul-Rahmon Sharafat ma’lum qilgan.
Uning so‘zlariga ko‘ra, bu shartnomalar mamlakat manfaatlari hisobga olinmagan holda tuzilgan va hozirda har yili millionlab dollarlar xorijiy kompaniyalarga ketib qolmoqda.
Yuklarimizning katta qismini olib o‘tadigan Hayraton portiga olib boruvchi yo‘l yiliga 18 million dollarga O‘zbekiston kompaniyasi tomonidan boshqariladi. Afg‘on kompaniyalari buni ancha arzonroq qilishga tayyor, — dedi Sharafat.
Shu munosabat bilan ARA rahbariyati hozirda mamlakat temiryo‘llarini boshqarishni mahalliy kompaniyalarga topshirish rejasi ustida ishlamoqda.
Yo‘lni “O‘zbekiston temir yo‘llari” boshqarib keladi
Hayraton—Mozori Sharif yo‘li 2010-yilda foydalanishga topshirilgan. Loyiha “O‘zbekiston temir yo‘llari” tomonidan Osiyo taraqqiyot banki granti (165 million dollar) va Afg‘oniston hukumatining o‘z mablag‘lari (15 million dollar) hisobidan amalga oshirilgan.
Bu “O‘zbekiston temir yo‘llari”ning birinchi xorijiy loyihasi edi. U Afg‘onistonning O‘zbekiston bilan chegarasidagi Hayraton vokzalidan Mozori Sharif shahrigacha bo‘lgan yangi bir yo‘lli temiryo‘l liniyasini qurish, Hayratondagi temiryo‘l vokzalini modernizatsiya qilishni o‘z ichiga olgan edi.
Yo‘lning umumiy uzunligi 106 kilometrni tashkil etdi. Hozirda “O‘zbekiston temir yo‘llari” tomonidan boshqariladi.
Afg‘oniston importining qariyb yarmi, shuningdek, gumanitar yuklarning salmoqli qismi Hayraton porti orqali o‘tadi. Bu temiryo‘lning foydalanishga topshirilishi yuk tashish hajmini sezilarli darajada oshirgan edi.
Izoh (0)