Марказий банк интервенсиялар ҳажмини оширди. Бу нима берди?

Марказий банк 2022 йил бошида валюта интервенсиялар ҳажмини оширди. Бу ҳақда банклараро пул бозори шарҳида қайд этилган (.pdf).

Хусусан, 2022 йилнинг I чорагида Марказий банк ички валюта бозорига интервенсиялари ҳажми 2,4 млрд долларни (26,8 трлн сўм эквиваленти) ташкил қилди. Бу 2021 йилнинг сўнгги чорагига нисбатан 19 фоизга кўп бўлди.

Интервенсиялар ҳажмининг ортиши ташқи хатарлар шароитида миллий валюта алмашув курсида юзага келиши мумкин бўлган кескин тебранишларни юмшатишга хизмат қилди, — дейилади шарҳда.

Сўмнинг алмашув курси бўйича мақсадли кўрсаткич йўқ

Марказий банк раиси Мамаризо Нурмуратовнинг сўзларига кўра, бугунги кунда валюта курслари бозор тамойиллари, яъни талаб ва таклиф асосида шаклланади.

Марказий банк бошқариладиган валюта курсидан эркин сузувчи валюта курсига узоқ ва қийин ўтишни бошдан кечирди ва валюта курсини эмас, балки инфляцияни асосий мақсади деб билади.

Бизда сўмнинг алмашув курси бўйича мақсадли кўрсаткич йўқ. Шу боис Марказий банк нейтраллик тамойили асосида валюта интервенсиялари сиёсатини давом эттиради, — деди Мамаризо Нурмуратов.

Айрим ҳолларда Марказий банк ташқи хатарларнинг салбий таъсирини минималлаштириш учун интервенсиялар ҳажмини оширади.

Ушбу чоралар макроиқтисодий ва молиявий барқарорликни таъминлашга ва шу орқали узоқ муддатли инклюзив иқтисодий ўсишга эришишга хизмат қилади.

Аввалроқ валюта бозорида кескин тебранишларнинг олдини олиш учун захиралар етарлилиги ҳақида хабар берилган эди.