Франциянинг амалдаги президенти Эммануэль Макрон сайлов бюллетенларининг 95 фоизи саналгандан сўнг, давлат раҳбарилиги учун бўлиб ўтган сайловларнинг биринчи турида пешқадам бўлиб қолмоқда. Бу ҳақда Франция Ички ишлар вазирлиги хабар берди. У 27,42 фоиз овоз тўплаган.
Ундан кейинги ўринда «Миллий ралли» ўнг партиясидан номзод Марин Ле Пен 24,03 фоиз овоз билан кетмоқда.
Учинчи ўринни «Забт этилмаган Франция» мухолифатчи партияси етакчиси Жан-Люк Меланшон (21,57 фоиз) эгаллаган бўлса, тўртинчи ўринни «Реконкиста» партиясининг етакчиси Эрик Земмур банд этган (6,97 фоиз). Бешинчи поғона Иль-де-Франц тумани раҳбари, «Республикачилар» консерватив партиясидан номзод Валери Пекрессга насиб этди (4,76 фоиз).
Францияда президентлик сайловларининг биринчи тури 10 апрель куни бўлиб ўтди ва унда 12 нафар номзод иштирок этди. Дастлабки маълумотларга кўра, овоз бериш жараёнларида сайловчиларнинг 65 фоизга яқини иштирок этган.
Экзит-полларнинг ҳисоб-китоблари бўйича Макрон сайловларда Ле Пендан кичик натижа билан олдинда кетмоқда — уларнинг иккиси ҳам 24 апрелда бўлиб ўтадиган иккинчи турда иштирок этади. 2017 йилги президентлик сайловларида иккала сиёсатчи ҳам иккинчи турга чиққан ва ўшанда Ле Пен Макронга ютқазиб қўйганди (мос равишда 33,9 фоиз ва 66,1 фоиз).
Сайлов участкалари ёпилиб, овоз бериш маълумотлари эълон қилинганидан сўнг, номзодларнинг аксарияти Макронни қўллаб-қувватлаган. Земмур ва «Олға, Франция» партияси етакчиси Николя Дюпон-Эньян Ле Пенга овоз беришга чақирди.
Маълумот учун, 2014 йилгача жамоатчиликка унча таниш бўлмаган Макрон ўша йили бош вазир Мануэль Вальс ҳукуматида Франция иқтисодиёт вазири этиб тайинланган. Бу лавозимда икки йил фаолият олиб борган Макрон 2016 йилда ўз партиясини тузиб, вазирликдан истеъфо берган ва президентлик сайловида қатнашиш учун номзодини илгари сурган. 2017 йил май ойида бўлиб ўтган сайловда мутлақ ғалаба қозониб, Франция республикасининг навбатдаги президенти этиб сайланган — бу билан у Франция республикаси тарихида энг ёш президент бўлди.
Изоҳ (0)