Агар Киев НАТО аъзоси бўлганида Россиянинг Украинага бостириб кириши содир бўлмасди, деди президент Владимир Зеленский. Бу ҳақда у Associated Press нашрига берган интервьюсида айтиб ўтди.
«Агар НАТО таркибида бўлганимизда бу уруш бўлмасди. Ёки бошқача кечарди. Биз яқин қўшниларимизга суянардик, бирга курашардик. Аммо ишончим комил, уруш бўлмас эди», — деди у.
Украина президенти Ғарбдаги ҳамкорлари томонидан тақдим этилган қуролларнинг айрим турлари Украинага жуда кеч етиб келганини айтди. Зеленскийнинг таъкидлашича, у бир қатор Европа етакчиларидан «100 фоиз қўллаб-қувватлаш» кўрмоқда, бошқалари эса позицияларини ўзгартириб олган.
Зеленский Россия билан тинчлик музокаралари ҳақида гапирар экан, украиналиклар урушнинг тугашини ва тинчликни қабул қилишни исташини, лекин бу уларнинг шартларига кўра бўлишини таъкидлади.
Одамлар қандай вазиятда бўлмасин тинчликни қабул қилади, чунки улар уруш тугашини хоҳлайди. Бизнинг шартларимизда, мустақиллик шартларида, Украина шартларида... Фарзандларидан айрилганлар бор, улар бунга сабабчи одамлар билан бирор шароитда ва бирор вақтда музокаралардан қаноатланади, деб ўйламайман. Чунки бу катта жароҳат...Агар ҳис-туйғуларни бир четга суриб қарасак, қанчалик оғир бўлмасин, ҳар қандай уруш тинчлик билан якунланиши кераклигини, ёки у миллионлаб қурбонлар билан ниҳояланишини тушунамиз.
Ҳа, биз курашишимиз керак, лекин бу кураш ҳаёт учун бўлиши зарур. Одамлар бўлмаса, оддий чанг учун курашилмайди-ку. Шунинг учун бу урушни тўхтатиш жуда муҳим. Гарчи бу қийин бўлса ҳам ҳиссий жиҳатдан қийин. Бу халқни қийноққа солган одамлар билан ҳеч ким музокара қилишни истамайди... Лекин бизда дипломатик йўл билан ечим топиш имконияти бўлса, уни қўлдан чиқара олмаймиз», — деди Украина президенти.
Изоҳ (0)