Самарқанд вилояти ИИБ ЖҚБ ҳамда ДХХнинг вилоят бошқармаси ходимлари ҳамкорлигида ўтказилган тезкор тадбирда ер сотиш билан боғлиқ ҳолатга чек қўйилди. Бу ҳақда Самарқанд вилояти ИИБ ахборот хизмати хабар берди.
Маълум қилинишича, Булунғур туманида ўтказилган тезкор тадбирда Самарқанд шаҳрида яшовчи 38 ёшли З.Ғ. маҳаллий фуқарога туман ҳокимлиги захирасидаги 10 гектар ер майдонига эгалик қилиш учун ўтказиладиган аукционда ғолиб бўлишни ҳамда ушбу ер майдонини унинг номига мансабдор танишлари орқали расмийлаштириб беришни ваъда қилган. Ушбу шахс хизмати учун 7,5 минг долларни олган вақтида ашёвий далиллар билан ушланган.
Ҳозирда фуқаро З.Ғ.га нисбатан Жиноят кодексининг 168-моддаси (фирибгарлик) 3-қисми «а» банди ва 211-моддаси (пора бериш) 2-қисми «б» банди билан жиноят иши қўзғатилиб, тергов ҳаракатлари олиб борилмоқда.
Аввалроқ Самарқандда 1 гектар ерни 430 минг долларга сотишга уринган шахслар қўлга олингани, Андижонда темир йўл станцияси бошлиғи ака-укага ер олиб бериш учун 8 минг доллар олгани, Тошкентда 2 гектар ерни 800 минг долларга сотишга уринган шахс ушлангани тўғрисида хабар берилганди.
Изоҳ (0)