Қашқадарёда эшаклар ота-ўғил ёш бола кўз ўнгида эшакларни аёвсиз калтаклангани, улар жавобгарликка тортилгани ҳақида хабар берилган эди. Ҳайвонларга озор берган фуқаро суд залида бунга нима сабаб бўлганини айтди.
Қайд этилишича, эшакларга нисбатан куч ишлатган фуқаро А.I. суд залида ҳолатга нима сабаб бўлгани ҳақида гапириб берган:
«Август ойида карантин вақти эди, сув жуда танқис бўлган. Мевали, манзарали дарахтларни қийналиб экканмиз, болаларим қаттиқ ишлаган. Эшаклар эса экин майдонини пайҳон қилиб ташлади. Шу сабаб жаҳлим чиққанидан уриб юбордим. Майиб бўлиб, қон чиққан жойи йўқ», — деган у.
Эслатиб ўтамиз, ҳодиса 2021 йилнинг 20 августида Чироқчи туманидаги «Лангар» МФЙ Тўлақўрғон қишлоғида юз берган. Воқеа иштирокчилари ота-ўғиллар бўлган.
Ҳолат юзасидан А.I. Маъмурий жавобгарлик тўғрисидаги кодекснинг 111-моддаси 2-қисми (вояга етмаган шахс ҳозирлигида ҳайвонларга нисбатан шафқатсиз муносабатда бўлиш ёхуд ҳайвонларнинг майиб бўлишига олиб келиш) билан айбдор деб топилиб, унга 12 сутка маъмурий қамоқ жазоси тайинланган. Воқеанинг иккинчи иштирокчиси судланувчининг ўғли Б.С. вояга етмагани учун унинг хатти-ҳаракати учун ҳам отаси Маъмурий жавобгарлик тўғрисидаги кодекснинг 47-моддаси (болаларни тарбиялаш ва уларга таълим бериш борасидаги мажбуриятларни бажармаслик) билан айбли деб топилиб, базавий ҳисоблаш миқдорининг бир баравари (270 минг сўм) миқдорида жаримага тортилган.
Аввалроқ Тошкентда қўшнисининг иккита хаски зотли итини ўлдирган эркакка 1,35 млн сўм жарима белгилангани, Навоийда номаълум эркак болалар кўз ўнгида итни отиб ташлагани ҳамда Тошкентда ит ва мушукларни милтиқда отиб юрган эркак ушлангани ҳақида хабар берилганди.
Изоҳ (0)