«Ўзбекистон бўйлаб саёҳат қил» дастурининг амалга оширилиши мамлакатда сайёҳлик маданиятининг ривожланишига сезиларли таъсир кўрсатди. Мамлакатда ички сайёҳларнинг умумий сони 2016 йилдаги 8,8 миллиондан 2019 йилда 14,7 миллионга, 2021 йилда эса 15 миллиондан ошган. Бу ҳақда Туризм ва маданий мерос вазирлиги маълум қилди.
Сўнгги 4 йил ичида Ўзбекистонда 833 та янги меҳмонхоналар: йирик, ўрта ва кичик меҳмонхоналар фойдаланишга топширилган. Жойлаштириш фондларининг умумий сони 1442 тага етган. Бунда хоналар сони — 33,4 минг донани ташкил этаётган бўлса, ундаги ўринлар — 71,2 тага етказилган. Айни пайтда Ўзбекистонда юзлаб янги меҳмонхона лойиҳалари барпо этилмоқда, улар яқин келажакда фойдаланишга топширилиши режалаштирилган.
2022 йил март ойида Ўзбекистонда барча тоифадаги меҳмонхоналар ва ҳостелларни ўртача банд қилиш бўйича статистик маълумотлар таҳлили ижобий ўзгаришларни кўрсатган.
«28—30 март кунлари – уч кунлик даврдаги юклама республика бўйича 70,8 фоиздан ортиқ, Тошкент шаҳрида 83,6 фоиз, Самарқандда 62,3 фоиз, Қорақалпоғистонда 93,9 фоиз, Хоразмда 56,3 фоиз, Бухорода 46 фоизни ташкил этган. Бу жуда яхши кўрсаткичлар бўлиб, туризм индустриясининг ўсишидан, меҳмонхона бизнеси учун эса рентабелликнинг тез тикланишидан дарак беради», — дейилади хабарда.
Таъкидланишича, 2019−2022 йилларда Ўзбекистонда бўлган сайёҳлар сонининг таҳлили сезиларли тикланиш динамикасини кўрсатмоқда, гарчи 2022 йилда бу кўрсаткич 15 фоизга ортда қолаётган бўлса-да, хоналар сони 2019 йилга нисбатан 26 147 ўриндан 33 411 тагача, яъни 7264 та меҳмонхона хонасига (21,7 фоиз) ошган.
Ўзбекистон меҳмонлари орасида маҳаллий сайёҳлар ва мамлакат фуқароларидан ташқари россияликлар — 23,4 фоиз, қозоғистонликлар – 18,9 фоиз, тожикистонликлар – 14,4 фоиз, туркияликлар — 7,7 фоизни ташкил этди. Меҳмонхоналарда яшовчи барча хорижликлар: қирғизистонликлар — 6,3 фоиз, беларусликлар — 4,6 фоиз, хитойликлар — 3,2 фоиз, францияликлар — 1,7 фоиз.
2019 йилнинг пандемиядан олдинги даврида 84,8 минг нафар чет эл фуқароси яшаган бўлиб, умумий улушда энг кўп россияликлар — 16,8 фоизни, қозоғистонликлар — 15 фоизни, тожикистонликлар — 6,3 фоизни, хитойликлар — 6,1 фоизни, афғонистонликлар — 5,7 фоиз, туркияликлар — 5,5 фоизни ташкил этган.
«Айни пайтда Ўзбекистон чет эл сайёҳлари учун тўлиқ очиқ. Бу борада барча чекловлар олиб ташланди. Ўзбекистонда туризм соҳасининг жадал тикланишида ижобий тенденциялар кузатилмоқда ва юқоридаги рақамлар 2022 йил охирига келиб 4,5 миллион нафаргача хорижий сайёҳлар мамлакатимизга кириб келишини кўрсатмоқда», — дея қайд этилади хабарда.
Аввалроқ Ўзбекистон тарихи, маданияти ва ўзбек тилининг хориж давлатларида тарғиботига 10 млрд сўм ажратилиши мумкинлиги, Ўзбекистон ва Россия туризм соҳасидаги ҳамкорликни ривожлантиришга келишиб олгани тўғрисида хабар берилганди.
Изоҳ (0)