Халқ таълими вазири ўринбосари Ўзбекистон Қирғизистонга 3,5 млн долларлик мактаб қуриб бергани тўғрисидаги танқидларга муносабат билдирди

Ижтимоий тармоқларда Ўзбекистон Қирғизистоннинг Боткен вилоятида 3,5 миллион долларлик мактаб қуриб бергани кўплаб муҳокамаларга сабаб бўлди. Ўзбекистоннинг ўзида мактаб етишмаётган бир вақтда, қўшни давлатлар қуриб бераётгани танқид ҳам қилинди. АОКАда бўлиб ўтган матбуот анжуманида халқ таълими вазирининг биринчи ўринбосари Усмон Шарифхўжаев мазкур ҳолатга муносабат билдирди.

Унинг сўзларига кўра, Ўзбекистон нафақат Қирғизистонда, балки Тожикистонда ҳам мактаб қурган.

«Мактаблар у ерда яшаётган миллатдошларимизга ҳам шароит қилиб бериш нуқтаи назаридан қурилди. Лекин ўз навбатида, у мамлакатлар ҳам Ўзбекистонда ижтимоий объектларнинг бир нечтасини барпо этган. Худди шу Қирғизистон ҳукумати Риштонда мактабгача таълим муассасасини қуриб берган. Тожикистон Самарқанднинг Ургут туманида 1,5 минг ўринли мактаб барпо қилган. Сиз ҳам қаергадир меҳмонга борсангиз, улар қилган нарсага жавоб берасиз. Мен бу ерда ҳеч қанақа ёмон нарса кўрмаяпман. Бу фақат қўшниларнинг ўртасидаги ҳамкорлик...

Ўзимизда роса муаммолар кўп, лекин у ерга боряпмиз дейиш эмас, бизда ҳам муаммолар ҳал бўляпти. Мактабларни бундан ҳам кўпайтириш масаласи қўйилган», — дейди вазир ўринбосари.

Шарифхўжаевнинг сўзларига кўра, 1,2 миллион қўшимча ўқувчи ўрнини яратиш бўйича алоҳида дастур қабул қилиниши белгиланган.

«Олдингига нисбатан 3—4 карра кўпроқ мактаб қурилаётганини айтсам ва буни кимдир ‘ёлғон’ деса билмадим, шунчаки статистикани кўтариш керак. Икки—уч йилдан бери давлат томонидан жуда кўплаб мактаблар қурилмоқда, лекин 10—15 йил давомида мактаб қурилмаганидан кейин уни етказиб беришни ҳам инобатга олиш керак.

Маълумот учун, мактаб қурилиши бўйича келишувга Қирғизистон президенти Садир Жапаровнинг 2021 йил 11—12 март кунлари Ўзбекистонга ташрифи чоғида Шавкат Мирзиёевнинг шахсий ташаббуси билан эришилган.

330 ўринли янги мактаб биноси қурилиши 2021 йил июль ойида бошланганди. Лойиҳанинг смета қиймати 3,5 миллион долларни ташкил этиб, ушбу пуллар Ўзбекистон томонидан ажратилган.

Эслатиб ўтамиз, Ўзбекистон 2017 йил октябрида Ўш шаҳрида Алишер Навоий номидаги 18-сонли янги замонавий мактаб-гимназия биносини қуришни бошлаб, уни 2018 йил 1 сентябрда фойдаланишга топширган эди.