Сурхондарё вилояти Термиз шаҳар камбағалликни қисқартириш бўлими бошлиғи ўринбосари субсидия ажратиш учун фуқародан пул олган вақтида ушланди, деб хабар беради Бош прокуратура ҳузуридаги департамент.
Маълум қилинишича, департаментнинг Сурхондарё вилояти бошқармаси томонидан 4 апрель куни ИИБ ходимлари билан ҳамкорликда тезкор тадбир ўтказилган. Тадбирда Термиз шаҳар иқтисодий тараққиёт ва камбағалликни қисқартириш бўлими бошлиғи ўринбосари Ғ.Н. Термиз шаҳрида субсидия тўланадиган талабгорларни танлаб олиш бўйича комиссияси масъул котиблигидан фойдаланиб, фуқаро Н.га уй-жой олиш мақсадида субсидия ажратилиши учун якуний хабарнома бериш эвазига 3 миллион сўм пора талаб қилгани аниқланган. У фуқародан муқаддам 1 миллион сўмни олиб, қолган 2 миллион сўмини олган вақтида ашёвий далиллар билан ушланган.
Мазкур ҳолат юзасидан Жиноят кодексининг 210-моддаси (пора олиш) билан жиноят иши қўзғатилиб, тергов ҳаракатлари ўтказилмоқда.
Аввалроқ Каттақўрғон шаҳар камбағалликни қисқартириш бўлими бош мутахассиси 1,2 минг доллар пора билан ушланган эди.
Изоҳ (0)