Шавкат Мирзиёев раислигида 8 апрель куни Саховат, Мурувват ва Меҳрибонлик уйлари ҳамда махсус мактаб интернатлари фаолияти бўйича видеоселектор йиғилиши бўлиб ўтмоқда, деб хабар берди «Дарё» мухбири.
«Саховат, Мурувват уйлари, Республика фахрийлар пансионатининг раҳбар ва шифокорлари иш ҳақи 1,5 баробарга, кичик ва ўрта тиббиёт ходимлари иш ҳақи 2 баробарга оширилди. Ушбу интернат уйларда яшовчи 9 минг 400 нафар кекса ва ногиронлиги бўлган шахс, ҳамда 18 минг нафар ҳеч кими йўқ ва ёлғиз яшайдиган фуқаро тиббий кўрикдан ўтказилиб, уларни соғломлаштириш чоралари кўрилди. Ногиронлиги бўлган 900 нафар болалар протез-ортопедия мосламалари билан таъминланди. ‘Замин’ жамғармаси билан ҳамкорликда заиф эшитувчи 2 мингдан зиёд болалар жами 4 мингта рақамли эшитиш мосламалари билан таъминланди, 11 та ихтисослашган мактаб-интернат ёрдамчи товуш-нутқ воситалари билан жиҳозланди», — деди президент.
Давлат раҳбари, бундан ташқари, 1 минг 100 нафар ногиронлиги бўлган шахс пультли аравачалар билан таъминланганини қайд этиб ўтди.
«Ўтган йили Саховат, Мурувват, Меҳрибонлик ва болалар уйлари, фахрийлар пансионатлари, мактаб-интернатларда 172 миллиард сўмлик қурилиш-таъмирлаш ва жиҳозлаш ишлари бажарилди. Масалан, 2021 йил 6 мартда Республика фахрийлар пансионатига ташрифда берилган топшириқларга мувофиқ, маданий-маърифий тадбирлар учун алоҳида бино қурилди, янги физиотерапия бўлими ташкил этилди. Ошхона, ётоқхона ва бошқа хоналар таъмирланиб, янгидан жиҳозланди. Шунингдек, пансионат ҳудуди обод қилиниб, унга туташ майдонда Нуронийлар боғи жадал барпо қилинмоқда», — деди давлат раҳбари.
Изоҳ (0)