Самарқанд вилоятининг Оқдарё туманида жойлашган машина-трактор паркида ёнғин содир бўлди. Бу ҳақда вилоят ФВБ матбуот хизмати хабар берди.
Маълум қилинишича, 7 апрель куни соат 05:56 да Самарқанд вилояти Оқдарё тумани «Наврўз» МФЙ Ўзбекистон кўчасида жойлашган «Агро Сервис» машина-трактор паркида ёнғин содир бўлаётгани тўғрисида туман Фавқулодда вазиятлар бўлимига хабар келиб тушган.
Воқеа жойига 5 та ёнғин-қутқарув экипажи соат 06:00 да етиб борган ва ёнғин соат 06:50 да тўлиқ бартараф этилган.
Ёнғин натижасида машина-трактор паркининг токарлик цехининг 150 квадрат метр майдонда шифт, том ва ички қисмидаги дастгоҳлари ёниб зарарланган. Ҳодиса оқибатида ҳалок бўлган ва жабрланганлар йўқ.
Ҳозирда ёнғиннинг келиб чиқиш сабаби ва келтирилган моддий зарар миқдори аниқланмоқда.
Аввалроқ Тошкентдаги озиқ-овқат дўконларининг бирида ёнғин чиққани, Андижондаги маҳаллаларнинг бирида жойлашган электр «шит» ёниб кетгани, Намангандаги «Чорсу» деҳқон бозорида ёнғин юз бергани, Тошкентдаги хонадонда телефон қувватлаш мосламасидан ёнғин чиққани тўғрисида хабар берилганди.
Изоҳ (0)