«Фарғона сув таъминоти» масъулияти чекланган жамияти Риштон туман бўлими ва «Боязитхон Файз 2020» оилавий корхонасининг мансабдор шахслари расмий ҳужжатларни қалбакилаштирган ҳолда истеъмолчилардан қабул қилинган жуда кўп миқдордаги пул маблағларини ўзлаштиргани аниқланди, деб хабар беради ЎзА.
Маълум қилинишича, мазкур МЧЖ аҳолидан ичимлик сув ва оқова хизмати учун 2020—2021 йилларда 1 минг 209 та тўлов патталари орқали жами 117 миллион 724 минг сўм нақд пулларни қабул қилиб, уларни бўлим ғазнасига кирим қилмай, банкнинг ҳисоб рақамига топширган ҳамда истеъмолчиларнинг Water Cоntrol биллинг базасидаги шахсий варақаларига киритмасдан, шахсий эҳтиёжлари учун сарфлаб юборган.
Шунингдек, ушбу даврда 198 та тўлов патталари орқали 33 миллион 45 минг сўм пулларни қабул қилиб, мазкур маблағлар истеъмолчиларнинг шахсий варақаларига киритилган бўлса-да, тўлов патталарини қалбакилаштириб, гўёки 6 миллион 503 минг сўм пуллар қабул қилиб олинганини кўрсатилган. Қолган пулларни эса ўзлаштириб, талон-тoрож қилинган. Бундан ташқари, аҳолидан 256 та тўлов патталари орқали йиғилган 13 миллион 828 минг сўм нақд пулларни қабул қилиб, айнан шу патталарни бошқа истеъмолчиларнинг номидан такроран расмийлаштириб, 19 миллион 751 минг сўм пулларни банк ҳисоб рақамига топширмасдан шахсий эҳтиёжлари учун сарфлагани маълум бўлган.
«Фарғона сув таъминоти» масъулияти чекланган жамияти Риштон тумани бўлими мансабдор шахслари туман тадбиркорликка кўмаклашиш маркази раҳбари Ш.Н. ва бошқалар билан тил бириктириб, 120 нафар аҳоли истеъмолчиларининг сув ҳисоблагичларини давлат қиёслов кўригидан ўтказиш учун 7 миллион 618 минг сўм пулларни қабул қилиб олиб, ҳисоблагичларни қиёсловдан ўтказмай сохта сертификатлар тайёрлаб берган ҳамда маблағлар талон-тарож қилинган.
Шунингдек, «Фарғона сув таъминоти» масъулияти чекланган жамияти Риштон тумани бўлими раҳбари Ж.С. бўлим маъмурий биносида ўзининг таъсисчилиги ва раҳбарлигида Paynet хизматини кўрсатувчи «Боязитхон Файз 2020» оилавий корхонасини ташкил қилиб, мазкур шохобча орқали 2021 йил 20 декабрдан 2022 йил 21 февралга қадар фуқаролардан ичимлик сув ва оқова хизмати учун 548 миллион 108,2 минг сўм нақд пулларни қабул қилиб олиб, ҳисоб рақамга ўтказмай жуда кўп миқдордаги пул маблағларини фирибгарлик йўли билан қўлга киритган.
Ҳолат юзасидан «Фарғона сув таъминоти» масъулияти чекланган жамияти Риштон тумани бўлими ва «Боязитхон Файз 2020» оилавий корхонасининг мансабдор шахслари ҳамда бошқаларга нисбатан Жиноят кодексининг 167-моддаси (ўзлаштириш ёки растрата йўли билан талон-торож қилиш) 3-қисми «а» банди, 228-моддаси (ҳужжатлар, штамплар, муҳрлар, бланкалар тайёрлаш, уларни қалбакилаштириш, сотиш ёки улардан фойдаланиш) 2-қисми «а,б» бандлари ва 3-қисми билан жиноят иши қўзғатилиб, тергов ҳаракатлари ўтказилмоқда.
Аввалроқ Ўзбекистонда 23 та уй-жой мулкдорлари ширкати томонидан 1,7 млрд сўм талон-торож қилингани, Олмалиқда қарийб 220 млн сўмлик насос агрегаторларини ўзлаштирган корхона раҳбари ушлангани, Сурхондарёда 220 минг долларлик кредит маблағларини ўзлаштирган МЧЖ раҳбари аниқлангани тўғрисида хабар берилганди.
Изоҳ (0)