Toshkentdagi xonadonda telefon quvvatlash moslamasidan yong‘in chiqdi

11-fevral kuni Toshkent shahrining Sergeli tumanida rozetkada qolib ketgan quvvatlantirgich oqibatida yong‘in chiqdi. Bu haqda “Mening yurtim” telekanalining “Markaziy studiya” dasturiga ma’lum qilindi.

Ma’lum qilinishicha, Sergeli tumani IIO FMB 2-sonli ichki ishlar bo‘limiga qarashli “Qipchoq” mahallasi hududiga biriktirilgan profilaktika katta inspektori kapitan Jamshid Toshkentboyev yordamchisi bilan hududni ko‘zdan kechirib chiqayotgan bo‘lgan.

Kutilmaganda mahallaning 13-uyida yashovchi fuqarolardan biri ularga qo‘ng‘iroq qilib, 58-xonadonda yong‘in bo‘layotganini bildirgan. Voqea joyiga yetib borgan inspektorlar xonadon ichida 68 yoshli fuqaro qolib ketganidan xabar topgan.

Inspektorlar yonayotgan uy ichiga kirib borib, fuqaroni xavfsiz joyga olib chiqishga muvaffaq bo‘lgan.

Aniqlanishicha, yong‘in rozetkada qolib ketgan quvvatlantirgichda yuzaga kelgan qisqa tutashuv oqibatida kelib chiqqan. Erigan quvvatlantirgich gilam ustiga tushib, yong‘inni yuzaga keltirgan.

Bundan avval Oltiariqdagi massajxonada, Zarafshon milliy bog‘ida, Samarqanddagi oshxonalardan birida yong‘in sodir bo‘lgani haqida xabar berilgandi.