Бухоро вилоятининг Вобкент туманидаги «Дўстлик» маҳалласида 2500 намозхонга мўлжалланган янги жоме масжид фойдаланишга топширилди, дея хабар берди «Дарё» мухбири.
Рамазоннинг илк кунида очилган «Қассоблик» жоме масжиди барча қулайликларга эга бўлган таҳоратхона, аёллар учун алоҳида намозхона, имом хатиб хонаси, маъмурий бинолар, кутубхона ҳамда азон айтиш учун мўлжалланган минорадан иборат.
«Мазкур масжидга илгари атиги 50 нафар намозхон сиғарди. Шу боис ҳам бу масжид 15 миллиард сўмга қайта қурилди. Бугунги кунда туманда масжидлар сони 10 тага етди. Мазкур жоме масжид фойдаланишга топширилган кун намозхонларга 2000 та Қуръони Карим ҳадя этилди. Эътиборлиси, бу масжидга намозхонлар жойнамоз билан келишмайди. 2500 намозхонга мўлжалланган жойнамоз ҳар куни тонг саҳардан ҳозирлаб қўйилади», — дейди туман бош имоми Ғолиб Очилов.
Вилоят бош имоми Жобир Эловнинг маълумот беришича, жоме масжиди очилишида таровиҳ намозлари ўқилиб, хатми Қуръон қилинган.
«Вилоятда бундай катта жоме масжидлар 106 тани ташкил этади. 101 тасида таровиҳ намозлари ўқилиб, 73 тасида Қуръони Карим хатми тўлиқ туширилмоқда. 5 тасида эса таъмирлаш ишлари олиб бориляпти. Тез кунда миллий ва ғоятда гўзал кўринишдаги бу масжидлар ҳам фойдаланишга топширилади», — дейди Жобир Элов.
Изоҳ (0)