Namangan viloyatining To‘raqo‘rg‘on tumanida muborak Ramazon oyi arafasida yangi masjid foydalanishga topshirildi. Bu haqda “Daryo” muxbiri Azizbek Abduvaliyev xabar bermoqda.
2021-yil aprelida qurilishi boshlangan “Kamolxon eshon buva” masjidi tumanning “Yortepa” mahallasida qad rostladi.
5 mingdan ortiq odam yashaydigan ushbu mahallada oldinlari masjid bo‘lmagan, aholi namoz o‘qish uchun qo‘shni qishloq yoki markazga borishga majbur edi.
Keng va muhtasham masjid ikki qavatdan iborat bo‘lib, jami 3,5 ming nafar namozxonga mo‘ljallangan. Tashqarida yozgi ayvon ham mavjud.
Masjid nomi “Yortepa”da yashab o‘tgan, nasabi Bahouddin Naqshbandga borib taqaladigan Said Kamolxon eshon buva sharafiga qo‘yilgan. Masjid atrofida bu avliyo zot va u kishining avlodlari dafn etilgan ziyoratgoh ham bor.
Said Kamolxon eshon buvaning nabirasi, 2021-yil dekabr oyida 95 yoshda vafot etgan namanganlik mashhur ulamo Muhsinxon to‘ra Hasanov bu masjid qurilishiga bosh-qosh bo‘lgandi. Mahalliy aholi va homiylar esa ezgu tashabbusni qo‘llab-quvvatladi.
“Kamolxon eshon buva” jome masjidi ishga tushganidan so‘ng, To‘raqo‘rg‘on tumanidagi masjidlar soni 12 taga, Namangan viloyatida esa 190 taga yetdi.