Ижтимоий тармоқларда Тошкент метрополитенининг поезди ярим соатдан бери тўхтаб қолгани айтилаётган хабарлар тарқалди. «Тошкент метрополитени» давлат унитар корхонаси ҳолатга изоҳ берди.
Маълум қилинишича, 7 апрель куни соат 09:30 лар атрофида «Пахтакор» метро бекатида 15-сонли ҳаракат таркибида машинист томонидан носозлик аниқланган ва хавфсизлик чораларини кўриш мақсадида йўловчилар вагондан туширилган.
Шунингдек, навбатдаги 18-сонли маршрут ҳам йўловчиларни «Пахтакор» метро бекатида тушириб, 15-электропоездни техник кўрикдан ўтказиш учун депога томон ҳаракатланишида кўмаклашган.
«Соат 09:37 дан бошлаб поездлар ҳаракати доимий жадвал асосида амалга оширилмоқда», — дейилади метрополитен изоҳида.
Эслатиб ўтамиз, 5 февраль куни «Халқлар дўстлиги» ва «Миллий боғ» бекатлари оралиғида ҳаракатланиб келаётган 4-сонли ҳаракат таркибида техник носозлик кузатилган ва поезд ҳаракатдан тўхтаган, 6 февраль куни эса метро поезди «Мустақиллик майдони» бекатида тўхтаб қолган эди.
Изоҳ (0)