Сурхондарё вилоятининг Шўрчи туманида икки кишини ўлдирганликда гумон қилинган 38 ёшли шахс Россиянинг «Домодедово» аэропортида қўлга олинди, деб хабар беради вилоят ИИБ ахборот хизмати.
Маълум қилинишича, 6 апрель куни соат 18:30 ларда туманнинг «Яккабоғ» маҳалласида жойлашган хонадонларидан бирида нафақахўр, 57 ёшли Х.Х.нинг жасади бўйин соҳасига ўткир тиғли жисм билан етказилган тан жароҳатлари ҳамда қизи, Сариосиё тумани «Зағнабод» қишлоғида доимий рўйхатда турувчи, уй бекаси, 30 ёшли М.З.нинг жасади юқори нафас йўллари ва бўйин аъзоларига ўткир тиғли жисм ёрдамида етказилган тан жароҳатлари билан топилган.
Ҳолат юзасидан вилоят прокуратураси томонидан Жиноят кодексининг 97-моддаси (қасддан одам ўлдириш) 2-қисми «а, ж» бандлари билан жиноят иши қўзғатилган.
Сурхондарё вилояти ИИБ Жиноят қидирув бошқармаси томонидан мазкур қотиллик жиноятини содир этишда гумонланган К.Ҳ.нинг собиқ турмуш ўртоғи, Сариосиё туманида истиқомат қилувчи, 38 ёшли Н.С.га нисбатан маҳаллий ва халқаро қидирув эълон қилинган.
ИИВ Жиноят қидирув бош бошқармаси ҳамда Тожикистон ИИВ Жиноят қидирув бош бошқармаси билан ҳамкорлигида амалга оширилган қидирув ишлари натижасида гумондор Н.С. жавобгарликдан қутулиш мақсадида Сурхондарё вилоятидан Тожикистонга ўтиб, у ердан Россияга кетгани аниқланган.
Россияда хизмат сафарида бўлган Сурхондарё вилояти ИИБ Жиноят қидирув бошқармаси ходимлари томонидан россиялик ҳамкасблари ҳамкорлигида, гумондор шахс Москва вилоятининг «Домодедово» аэропортида қўлга олинган.
Ҳозирда гумондорни Ўзбекистонга қайтариш чоралари кўрилмоқда.
Аввалроқ Ўзбекистонда фирибгарлик содир этгани учун халқаро қидирувда бўлган шахс Польшадан экстрадиция қилингани тўғрисида хабар берилганди.
Изоҳ (0)