Шавкат Мирзиёев раислигида 7 апрель куни ўтказилган видеоселектор йиғилишида кун тартибидаги иккинчи масала — «Яшил макон» дастури доирасидаги ишлар ҳам муҳокама қилинди. Бу ҳақда Президент матбуот котиби хабар қилди.
Қайд этилишича, лойиҳа доирасида баҳор мавсумида 125 миллион туп кўчат экиш режа қилинган.
«Мавсум тугашига ҳам озгина вақт қолди. Лекин бу борада қилинган ишлар аҳволи мени хавотирга солмоқда. Айрим ҳудудларда ҳали ҳам ишлар номигагина ташкил этилиб, кўзбўямачилик давом этаётгани тўғрисида менда маълумотлар етарли», — деган президент.
Жойларда ҳақиқатда экилмаган жами 5 миллион туп кўчатларни ҳисоботда қўшиб ёзиш ҳолатлари бор. Шу боис мутасаддиларга апрель ойида барча қолоқликлар ва камчиликларни тўлиқ бартараф этиш топширилган. Апрель ойи якунига қадар вилоят ҳокимлари тегишли идоралар билан бирга:
- туманлардаги йирик маҳаллаларга 20—30 минг, ўрта маҳаллаларга – 10—15 минг, кичикларига – 3—5 минг терак қаламчалари;
- шаҳарларнинг ҳар бир маҳалласига 3—5 минг терак қаламчалари экилишини таъминлаши;
- автомобиль йўллари бўйида камида 5 миллион туп терак кўчатлари ва қаламчалари экишни ташкил қилиши шартлиги таъкидланган.
Бундан ташқари, «Яшил макон» дастури доирасида жорий йилда 700 километрдан зиёд янги суғориш тизими ва 260 та қудуқ ўрнатилиши режа қилинган. Йиғилишда вилоят ҳокимлари, Автомобиль йўллари ва Ўрмон хўжалиги қўмиталари раҳбарларининг суғориш тизими учун қанча маблағ ажратилгани, қанча майдонда ирригация тизими яхшилангани, нечта техника олингани ва қудуқ қазилгани ҳақидаги ҳисоботлари эшитилган.
Изоҳ (0)