Қозоғистон дон ва ун экспортини чекламоқчи. Бу Ўзбекистонга қандай таъсир қилади?

Россия дон экспортини тақиқлаганидан сўнг, Қозоғистон ҳам дон ва ун экспортини вақтинча чеклаш масаласини кўриб чиқмоқда. Бу ҳақда Қозоғистон қишлоқ хўжалиги вазири Ербол Карашукеевга таяниб, Reuters хабар бермоқда.

Карашукеевнинг айтишича, фермерлар ўз маҳсулотларини экспорт қилишдан олдин ички талабни қондиришлари керак.

Қозоғистон одатда қўшни Марказий Осиё давлатлари ва Афғонистонга дон экспорт қилади; у, шунингдек, доннинг бир қисмини Хитойга ва Қора денгиз портларига жўнатади. Шу билан бирга, Қозоғистон Россиядан чекланган миқдорда буғдой импорт қилади.

Ўзбекистонга қандай таъсир қилиши мумкин?

Бундан ташқари, Ўзбекистонда 1 апрелдан бошлаб «Озиқ-овқат хавфсизлиги ва ички бозорда нархлар барқарорлигини таъминлаш бўйича қўшимча чора-тадбирлар тўғрисида»ги ҳукумат қарори кучга кирди.

Унда дунё бозорларида юзага келган кескин тебранишларнинг ички бозорни озиқ-овқат маҳсулотлари билан таъминлашга салбий таъсирини камайтириш, ички бозорни буғдой, ун ва ўсимлик ёғи маҳсулотлари билан узлуксиз ва кафолатли таъминлаш мақсадида бир неча чоралар белгиланган.

Ҳужжатга кўра, 2022 йил апрель—июль ойларида Қозоғистондан 100 минг тонна 3-синф буғдойи (бир қисми ун) мақбул нархларда импорт қилинади.

Қишлоқ хўжалиги вазирлиги ва Иқтисодий тараққиёт ва камбағалликни қисқартириш вазирлиги ички ва ташқи бозорлардаги вазиятдан келиб чиқиб яна 500 минг тонна буғдойни импорт қилиш зарурати юзасидан асослантирилган таклиф киритади.

2022 йил 1 апрелдан бошлаб йил якунига қадар импорт қилинадиган буғдой (ун) ва ўсимлик ёғини темир йўллар орқали ташишда 50 фоизли имтиёзли тарифлар қўлланади. 

Юкларни вагонлардан тушириб олиш муддати бўйича қўлланадиган тарифлар (простой) миқдори барча турдаги буғдой импортёрларига дастлабки уч кун учун 40 фоизга пасайтирилади.

Аввалроқ Қишлоқ хўжалиги вазирлиги Ўзбекистонда 2022 йилда буғдой ва шакар маҳсулотларида барқарорлик таъминланишини маълум қилган эди.