Самарқанд вилоятида халқ таълими бошқармаси бошлиғи, унинг ўринбосари ва Нуробод тумани халқ таълими бўлими мудири алмашди. Бу ҳақда «Дарё» мухбири хабар берди.
Вилоят ҳокими ўринбосари Хуршид Очилов иштирокида вилоят халқ таълими бошқармасида бўлиб ўтган йиғилишда халқ таълими вазири буйруғига асосан Султонов Шокир Қувонович вилоят халқ таълими бошқармаси бошлиғи вазифасини бажарувчи этиб тайинланган. Тайинловга қадар Шокир Султонов Пахтачи тумани халқ таълими бўлими мудири вазифасида фаолият юритган.
Шу вақтга қадар Самарқанд вилояти халқ таълими бошқармаси бошлиғи вазифасида ишлаб келган Зебинисо Шодиева ўз аризасига кўра ишдан олиниб, 5 апрель куни Самарқанд шаҳридаги Пушкин номли вилоят ахборот-кутубхона марказига раҳбар этиб тайинланган.
Зебинисо Шодиеванинг нима сабабдан ишдан олинганлиги ҳеч қаерда очиқланмаган.
Вилоят халқ таълими бошқармаси бошлиғи ўринбосари лавозимида фаолият юритиб келган Жангиров Озод Жаниқулович Нуробод тумани халқ таълими бўлими мудири вазифасини бажарувчи этиб тайинланган.
Нуробод тумани халқ таълими бўлими мудири ноутбук можароси ортидан ишдан олинган эди.
Шунингдек, Ялғашев Олимжон Рашидович вилоят халқ таълими бошқармаси бошлиғи ўринбосари вазифасини бажарувчи этиб тайинланди. Тайинловга қадар Олимжон Ялғашев ТАТУ Самарқанд филиали директор ўринбосари вазифасида фаолият юритган.
Изоҳ (0)