«Пахтакор»га қарши ўйиндан сўнг «Навбаҳор» посбони Ўткир Юсупов майдон четидаги мухлисга ташланди (видео)

Футбол бўйича Ўзбекистон Суперлигаси 4-туридан ўрин олган «Пахтакор» ва «Навбаҳор» ўйинидан (1:0) кейин жанжал келиб чиқди.

«Навбаҳор» жамоаси дарвозабони Ўткир Юсупов ўйин якунига етгач, майдон четида турган «Пахтакор» формасидаги йигитни дўппослашга ҳаракат қилган. «Championat.asia»нинг хабарига кўра, майдон четидаги мухлис «шерлар» фан-клуби етакчиси бўлган. У ўйин вақтида майдон четидаги тўпларни исталган томонга тепиб юборавергани айтилмоқда. Дарвозабоннинг эса бундан жаҳли чиқиб, ҳакам ҳуштаги янграгач, у томонга югуриб борган.

«Навбаҳор» посбонига қандай жазо тайинланиши аниқ эмас.

Аввалроқ, «Навбаҳор» мухлисининг 2 та тиши синган, тан жароҳатлар олган ва тез ёрдамга мурожаат қилгани, тез ёрдам ходими ҳам беморни «Пахтакор» стадиони ёнидан олганини тасдиқлагани ҳақида хабар қилинганди. Ҳозирда ҳолат юзасидан Шайхонтоҳур тумани ИИО ФМБ томонидан текширув ўтказилмоқда.

«Пахтакор» Тошкентда бўлиб ўтган ўйинда «Навбаҳор» устидан кичик ҳисобда ғалаба қозонди ва очколари сонини 10 тага етказиб, 2-ўринга кўтарилиб олди. «Навбаҳор» эса 7 очко билан 3-ўринга жойлашди.