Собиқ футболчи Дэвид Бекҳэмнинг саройига ўғри тушди.
Ҳодиса 28 февраль куни содир бўлган, бироқ бу ҳақидаги хабарлар энди маълум бўлди.
«Манчестер Юнайтед» ва «Реал»нинг собиқ футболчиси рафиқаси ва ўн ёшли қизи билан Лондондаги саройининг биринчи қаватида бўлиб турганида, ўғри бинога бостириб кирган. У дарвозадан ошиб, сўнгра юқори қаватдаги ётоқхона деразасидан саройга кирган.
Бузғунчиликни кечроқ уйга қайтган Бекҳэмнинг 17 ёшли ўғли Круз пайқаган. У полда ойна синиқларини кўрган.
Жиноятчи собиқ футболчининг уйидан дизайнерлик либослари, аксессуарлар ва электроника буюмларини ўғирлаб кетган. Йўқотиш бир неча минг фунтга баҳоланган. Тахминларга кўра, ўғриликни амалга оширган шахс ҳудудда фаолият юритувчи жиноий тўдалардан бирининг аъзоси.
Ҳозирда полиция тергов ҳаракатларини олиб бормоқда.
Аввалроқ «Атлетико»га қарши ўйин вақтида Пол Погбанинг уйига ўғри тушганди. Карим Бенземанинг уйи тўнаб кетилгани хабар қилинганди. «Ливерпуль» футболчиси Фабиньо ҳам ўғрилик қурбони бўлганди. Талончилар «Манчестер Сити» вингери Риёд Маҳрезни ярим миллион еврога чув туширгани ҳақида хабар берилганди. Деле Алли эса ўз уйида босқинчи ўғрилар томонидан калтакланганди.
Изоҳ (0)