31 март куни Ўзбекистон ташқи ишлар вазири ўринбосари Владимир Норов Бирлашган Миллатлар Ташкилотининг Афғонистондаги гуманитар мажбуриятлар бўйича онлайн-конференциясида иштирок этди. Бу ҳақда ТИВ матбуот хизмати хабар берди.
Анжуман БМТ томонидан Буюк Британия, Германия ва Қатар ҳукуматлари билан биргаликда БМТнинг Афғонистондаги гуманитар фаолиятини молиялаштириш учун донорлик маблағларини сафарбар қилиш ва ушбу мамлакатдаги гуманитар инқирозга халқаро ҳамжамият эътиборини жалб қилиш мақсадида ташкил этилган.
Тадбир очилишида БМТ Бош котиби Антонио Гутерриш ва ташкилотчи мамлакатларнинг ташқи сиёсат идоралари раҳбарлари сўзга чиққан. Ялпи мажлис доирасида Афғонистондаги ҳозирги гуманитар вазият, жумладан, хотин-қизлар ва болалар аҳволига алоҳида урғу берилган ҳолда муҳокама қилинган.
Ўзбекистон ташқи ишлар вазирининг ўринбосари Владимир Норов ўз нутқида, Ўзбекистоннинг Афғонистондаги вазиятни барқарорлаштириш ва мамлакат муваққат ҳукумати билан ҳамкорликни йўлга қўйиш борасидаги позицияси ва қарашларини тилга олган.
«Дунёда рўй бераётган воқеалар муносабати билан, афсуски, халқаро ҳамжамиятнинг Афғонистонга эътибори бироз пасайганини кўряпмиз. Дарҳақиқат, афғон масаласи жаҳон сиёсати фонига иккинчи даражага тушиб қолди. Бунга йўл қўйиб бўлмайди. Халқаро ҳамжамият ушбу давлатнинг бугуни ва келажаги учун жавобгар бўлиши керак.Шунингдек, Ўзбекистон томонидан афғон халқига гуманитар ёрдам кўрсатиш борасида амалга оширилаётган аниқ чора-тадбирлар тўғрисида маълумот берилган. Афғонистонга кўмаклашиш бўйича халқаро саъй-ҳаракатларни сафарбар қилиш ва мувофиқлаштиришда БМТнинг фаол иштирок этиши муҳимлиги қайд этилган.Ҳозирда мазкур давлат ўз ривожланишининг ҳал қилувчи босқичида. Ё бу давлат жаҳон ҳамжамиятининг ёрдами билан нормал иқтисодиёт ва тараққиёт пойдеворини қуриш учун шарт-шароит яратади ёки яна террористик ва экстремистик ташкилотларнинг бошпанасига айланади», — дейди Норов.
Эслатиб ўтамиз, ташқи ишлар вазири Абдулазиз Комилов 2021 йил 8 сентябрь куни Афғонистон масаласи бўйича 20 дан ортиқ ТИВ раҳбарлари иштирокида бўлиб ўтган учрашувда Афғонистон учун можаролардан кейинги стратегияни ишлаб чиқиш, жумладан, унинг иқтисодиётини тиклаш, мамлакатни минтақавий интеграцион жараёнларга жалб қилиш, инфратузилма лойиҳаларини амалга ошириш зарурлигига эътибор қаратганди. «Толибон» расмийси 7 октябрь куни Кобулда Ўзбекистон ташқи ишлар вазири Абдулазиз Комилов билан ўтказилган музокаралар давомида Ўзбекистон хавфсизлигига Афғонистон ҳеч қандай таҳдид бўлмаслигини айтганди.
Изоҳ (0)