Abdulaziz Komilov Afg‘oniston masalasi bo‘yicha 20 dan ortiq TIV rahbarlari ishtirokidagi uchrashuvda qatnashdi
O‘zbekiston tashqi ishlar vaziri Abdulaziz Komilov 2021-yilning 8-sentabr kuni Afg‘oniston bo‘yicha videokonferensaloqa shaklidagi vazirlar uchrashuvida ishtirok etdi.
AQSh Davlat departamenti va Germaniya Tashqi ishlar vazirligi tashabbusi bilan tashkil etilgan yig‘ilishda dunyoning 20 dan ortiq mamlakatlarining tashqi siyosiy idoralari rahbarlari hamda BMT, Yevropa Ittifoqi va NATO vakillari qatnashdi.
Tadbirda Afg‘onistondagi mavjud vaziyat, Afg‘oniston inqirozini hal qilish bo‘yicha sa’y-harakatlarni birlashtirish va mamlakat aholisiga gumanitar yordam ko‘rsatish masalalari muhokama qilindi.
Asosiy inson huquq va erkinliklariga rioya qilish, xususan, ayollar va milliy ozchiliklar huquqlarini ta’minlash, Afg‘oniston hududida terroristik tashkilotlar faoliyat yuritishining oldini olish borasidagi majburiyatlarning bajarilishi muhimligi qayd etildi.
O‘zbekiston tashqi ishlar vaziri o‘z nutqida Afg‘oniston uchun mojarolardan keyingi strategiyani ishlab chiqish, jumladan, uning iqtisodiyotini tiklash, mamlakatni mintaqaviy integratsion jarayonlarga jalb qilish, infratuzilma loyihalarini amalga oshirish zarurligiga e’tibor qaratdi.
Mavzuga doir:
- Abdulaziz Komilov Buyuk Britaniya tashqi ishlar vaziri Dominik Raab bilan suhbatlashdi
- Abdulaziz Komilov Italiya tashqi ishlar vaziri bilan Afg‘onistondagi vaziyatni muhokama qildi
- O‘zbekiston Prezidentining Afg‘oniston bo‘yicha maxsus vakili Ismatulla Irgashev Turkiya elchisi Olgan Bekar bilan uchrashdi
