Польша апрель ёки майда Россия кўмиридан бутунлай воз кечишни режалаштирмоқда

Польша ҳукумати апрель ёки май ойларида Россия кўмиридан бутунлай воз кечишни режалаштирмоқда. Бу ҳақда 30 март кунги матбуот анжуманида Польша бош вазири Матеуш Моравецкий маълум қилди.

«Вазирлар Кенгашида биз Россия кўмиридан воз кечиш режасини қабул қилдик», — деди бош вазир ҳамда Варшава буни Европа Иттифоқининг умумий розилигисиз амалга ошираётганини таъкидлади. «Биз буни у ерда (Евроиттифоқда) мавжуд қоидаларга зид равишда қиляпмиз», — деди Моравецкий.

Эндиликда режа парламент томонидан тасдиқланиши ва президент томонидан имзоланиши керак. «Апрель, энг кечи, май ойида Россия кўмиридан бутунлай воз кечиш вақти келади», — деди бош вазир. Шунингдек, у 2022 йил охиригача Россия нефтидан ҳам бутунлай воз кечиш режалаштирилаётганини айтди.

Польша ҳукумати Австралия, Жанубий Африка ёки Колумбиядан кўмир импорт қилиш қимматроққа тушмайди, деб ҳисобламоқда. «Биз ушбу қарор польшаликларнинг ҳамёнига зарар қилмаслиги, улар аввалгидан қимматроқ тўламаслиги учун ҳамма нарсани қиламиз», — дея ишонтирди бош вазир.

Республиканинг иқлим ва атроф-муҳитни муҳофаза қилиш вазири Анна Москва республикага 8 миллион тонна кўмир кераклигини таъкидлади. «Биз етказиб беришни қаерда ва қандай ташкил қилишни биламиз», — деб ишонтирди у.

Германия ҳам кузга бориб Россия кўмиридан, 2022 йил охирида эса Россия нефтидан мустақил бўлишни мақсад қилган. Март ўрталарида Германия Қатар билан газ бўйича узоқ муддатли ҳамкорлик тўғрисида келишиб олгани ҳақида хабар қилинди.