Буюк Британия ташқи ишлар вазири Лиз Трасс Украинадаги махсус ҳарбий операция муносабати билан 30 март куни Россияга қарши янги санкциялар пакетини тақдим этади. Пакет қора рўйхатга киритилган россиялик бизнесменларнинг самолётлари ва яхталарини техник кўрикдан ўтказиш бўйича чекловлар, шунингдек, Луганск ва Донецк Халқ Республикаларига нисбатан санкцияларни ўз ичига олади.
«Парламентга кўриб чиқиш учун тақдим этилган янги қонун ҳужжатлари доирасида Қрим бўйича санкциялар Донецк ва Луганск вилоятларининг Украина ҳукумати назоратида бўлмаган ҳудудларига ҳам жорий этилади», — дейилади ҳужжатда.
Буюк Британия Россияга қарши санкцияларни охирги марта 24 март куни кенгайтирганди. Ўшанда Россиядан жами 59 нафар шахс ва ташкилот, шунингдек, Беларусдан олти нафар шахс қора рўйхатга киритилди. Улар орасида «Сбербанк» раҳбари Герман Греф, «Тинкофф» банки асосчиси Олег Тинков, шунингдек, «Газпромбанк», «Алфа-банк», «Россия темир йўллари», «АЛРОСА» ва «РусГидро» бор.
Аввалроқ Хитой ташқи ишлар вазири Россияга қарши санкцияларни номақбул деб атаганди. Хитой ТИВ раҳбарининг фикрича, Европа санкциялари можарода иштирок этмаган бошқа давлатларга ҳам зарар етказмоқда.
Изоҳ (0)