Ғарбнинг Россияга нисбатан оғир санкцияларини қабул қилиб бўлмайди. Бу ҳақда Хитой ташқи ишлар вазири Ван И Европа Иттифоқининг ташқи ишлар ва хавфсизлик сиёсати бўйича олий вакили Жозеп Боррел билан видеомулоқот чоғида маълум қилди.
«Энг қаттиқ санкциялар ҳар икки томонга зарар етказиши ва вазиятни янада мураккаблаштириши, қарама-қаршиликларни кучайтириши мумкин», — деди Ван И.
Бундан ташқари, Хитой ТИВ раҳбарининг фикрича, Европа санкциялари можарода иштирок этмаган бошқа давлатларга ҳам зарар етказмоқда. «Дунёни бўлгич усуллар билан бошқариб бўлмайди», — дея хулоса қилди Ван И.
Аввалроқ Боррел Россия ва Хитой ўртасидаги эҳтимолий иттифоқ ҳақида гапирар экан, бу дунё бўйлаб «ақл бовар қилмайдиган» номутаносибликка олиб келишини, шунинг учун бундай тенденцияларга йўл қўймаслик кераклигини айтганди. «Бўлаётган воқеаларнинг салбий оқибатларидан бири шундаки, биз Россияни Хитой томон итариб, глобал жануби-шарқ ва глобал шимоли-ғарб ўртасида бўлиниш яратиб қўйишимиз мумкин», — деган дипломат.
Аввалроқ Хитой ташқи ишлар вазирининг ўринбосари Ле Юйчен Ғарбнинг Россияга қарши санкцияларини «борган сари ғазаблантирадиган» деб атаганди. У шунингдек, НАТО шарқ томон кенгайиб, Россия каби ядровий давлатни «бурчакка» ҳайдамаслиги кераклигини айтган.
Хитой Россиянинг Украинага бостириб киришини қораламади; у БМТ Бош ассамблеясининг тегишли резолюциясига овоз беришда бетараф қолди. Норасмий маълумотларга кўра, Украинага бостириб киргандан кейин Россия ҳарбий ёрдам сўраб, Хитойга мурожаат қилган. Кремль бу хабарлар ҳақиқатга тўғри келмаслигини билдирди.
Изоҳ (0)