Россия ва АҚШ президентлари Украинадаги кескинлик пасайтирилган тақдирдагина учрашиши мумкин. Бу ҳақда Оқ уйнинг коммуникациялар бўйича директори Кейт Бедингфилд брифингда маълум қилди.
Унинг сўзларига кўра, Байден Путин билан музокаралар унда нима муҳокама қилинишидан келиб чиқиб, ўтказилишини айтган. Бедингфилд бирор-бир шарт қўйишдан бош тортган.
«Президент Байден суҳбат амалга ошишдан олдин Россия томонидан деескалация ва дипломатияга содиқлик бўлиши кераклигини маълум қилган», — дейди Оқ уй вакили.
Аввалроқ Америка етакчиси Путин билан учрашувни истисно этмаган, бироқ у учрашув суҳбат нима ҳақида бўлишига боғлиқлигини таъкидлаган. «Ушбу урушни тугатадиган ва Украинани қайта тиклаш имконини берадиган асослар бўлиши керак», — деган у.
2021 йилнинг июлида Женевада Путин ва Байден ўртасида музокаралар ўтказилганди. Декабрь ойида давлат раҳбарлари видеоконференция форматида мулоқот қилган. Бундан ташқари, улар бир неча бор телефон орқали суҳбатлашган. Охирги марта президентлар 12 февраль куни қўнғироқлашишган эди.
Россия томонидан Украинада ҳарбий операциялар бошлангач, Байден россиялик ҳамкасбини бир неча бор ҳақорат қилди. Хусусан, 17 март куни Жо Байден Владимир Путинни «қонли диктатор ва Украина халқига қарши ахлоқсиз уруш олиб бораётган ҳақиқий каллакесар» деб атади. Ундан аввал, 16 март куни эса Байден Россия президентини ҳарбий жиноятчи деб атаганди. Дмитрий Песков АҚШ давлат раҳбарининг «Путинни ҳарбий жиноятчи» деб атаган баёноти «ўринсиз ва кечириб бўлмайдиган нутқдан» бошқа нарса эмаслигини айтган.
Эслатиб ўтамиз, бир йил олдин Байден Путинни «қотил деб ҳисоблайсизми?» деган саволга ижобий жавоб берганди.
Изоҳ (0)