Чеченистон раҳбари Рамзан Қодиров Россиянинг Украинадаги «махсус операцияси» давомида Киевни қўлга киритиш кераклигини айтди. Бу ҳақда у Россия Киев йўналишидаги ҳарбий фаолликни камайтиргандан кейин Грознийда ҳарбий кучларнинг кенг кўламли йиғилишида айтган, деб ёзади «РИА Новости».
«Мен тўхтаб қолмаслик, бошланган ишни охирига етказиш зарурлигини таъкидлайман. Биз Киевга бориб, Киевни олишимиз керак. Агар Киев атрофида қолганимизда эди, Киевга бориб, ҳамма нарсани тартибга келтирган бўлардик», — деди Қодиров.
Чеченистон расмийларининг маълумотларига кўра, 28 март куни Рамзан Қодиров Россия қамалида бўлган Мариуполга ташриф буюрган. Сафардан сўнг Қодиров ижтимоий тармоқларда «Донбасснинг тинч аҳолисини ҳимоя қилиш ва Украинадаги махсус операцияни мантиқий ғалаба билан якунлаш бизнинг бевосита масъулиятимиз», — деб ёзди.
29 март куни Истанбулда Россия—Украина музокараларининг навбатдаги раунди бўлиб ўтди, шундан сўнг Россия мудофаа вазири ўринбосари Александр Фомин Россия Киев ва Чернигов йўналишларида ҳарбий фаолликни «кескин қисқартириши»ни маълум қилди. CNN Америка манбаларига таяниб хабар беришича, Қўшма Штатлар Россия ўз қўшинларининг бир қисмини Киевдан олиб чиқиб кетаётганига гувоҳ бўлмоқда.
Ўша куни Россия Мудофаа вазири Сергей Шойгу Украинадаги махсус ҳарбий операциянинг асосий вазифалари бажарилганини, шунинг учун энди асосий мақсад – Донбассни озод қилишга эътибор қаратиш имконияти борлигини айтди.
Эслатиб ўтамиз, Россия президенти Владимир Путин 24 февраль куни Украинада «махсус ҳарбий операция» бошланганини эълон қилди. У ўз мақсадларини Украинани демилитаризация қилиш ва Донбасс аҳолисини «геноцид»дан ҳимоя қилиш деб атади.
Россия—Украина урушига оид тезкор, ишончли янгиликлар ва маълумотларни «Дарё»нинг Live саҳифаси орқали кузатиб боринг → @Daryo_Live
Изоҳ (0)