G‘arbning Rossiyaga nisbatan og‘ir sanksiyalarini qabul qilib bo‘lmaydi. Bu haqda Xitoy tashqi ishlar vaziri Van I Yevropa Ittifoqining tashqi ishlar va xavfsizlik siyosati bo‘yicha oliy vakili Jozep Borrel bilan videomuloqot chog‘ida ma’lum qildi.
“Eng qattiq sanksiyalar har ikki tomonga zarar yetkazishi va vaziyatni yanada murakkablashtirishi, qarama-qarshiliklarni kuchaytirishi mumkin”, — dedi Van I.
Bundan tashqari, Xitoy TIV rahbarining fikricha, Yevropa sanksiyalari mojaroda ishtirok etmagan boshqa davlatlarga ham zarar yetkazmoqda. “Dunyoni bo‘lgich usullar bilan boshqarib bo‘lmaydi”, — deya xulosa qildi Van I.
Avvalroq Borrel Rossiya va Xitoy o‘rtasidagi ehtimoliy ittifoq haqida gapirar ekan, bu dunyo bo‘ylab “aqlbovar qilmaydigan” nomutanosiblikka olib kelishini, shuning uchun bunday tendensiyalarga yo‘l qo‘ymaslik kerakligini aytgandi. “Bo‘layotgan voqealarning salbiy oqibatlaridan biri shundaki, biz Rossiyani Xitoy tomon itarib, global janubi-sharq va global shimoli-g‘arb o‘rtasida bo‘linish yaratib qo‘yishimiz mumkin”, — degan diplomat.
Avvalroq Xitoy tashqi ishlar vazirining o‘rinbosari Le Yuychen G‘arbning Rossiyaga qarshi sanksiyalarini “borgan sari g‘azablantiradigan” deb atagandi. U shuningdek, NATO sharq tomon kengayib, Rossiya kabi yadroviy davlatni “burchakka” haydamasligi kerakligini aytgan.
Xitoy Rossiyaning Ukrainaga bostirib kirishini qoralamadi; u BMT Bosh assambleyasining tegishli rezolyutsiyasiga ovoz berishda betaraf qoldi. Norasmiy ma’lumotlarga ko‘ra, Ukrainaga bostirib kirgandan keyin Rossiya harbiy yordam so‘rab, Xitoyga murojaat qilgan. Kreml bu xabarlar haqiqatga to‘g‘ri kelmasligini bildirdi.
Izoh (0)