Россиянинг Владивосток шаҳрида кўп қаватли уйдан йиқилиб тушган Ўзбекистон фуқароси ватанга қайтарилди, деб хабар беради Ташқи меҳнат миграцияси агентлиги.

Маълум қилинишича, асли хоразмлик бўлган Ю.Р. эҳтиётсизлик оқибатида кўп қаватли бинонинг 2-қаватидан тушиб кетган. Оқибатда у ногиронлик аравачасига ўтириб қолган.

«Владивостокка ишлашга келгандим. Ҳозирда шифохонага тушиб қолдим, ҳам ҳужжатларимни йўқотганман», — дейди эркак.

Ўзбекистоннинг Владивосток шаҳридаги Бош консулхонаси томонидан фуқарога Владивосток—Тошкент йўналишидаги авиарейс учун чипта олиб берилган. «У маҳаллий ўзбек диаспораси вакиллари ва фаол ватандошлар ҳамкорлигида Ўзбекистонга қайтарилди», — дейилади хабарда.

Эслатиб ўтамиз, 2022 йилнинг февралида Россияда баландликдан йиқилиб, бошидан оғир жароҳат олган ўзбекистонлик ватанга қайтарилганди.