Андижон шаҳри ҳокими Баҳром Ҳайдаров 2022 йилнинг 24 март куни юрак аритмияси касаллиги билан вилоят Кардиология марказига ётқизилган, дея хабар бермоқда «Дарё» мухбири.
Ҳоким юрак аритмияси касаллиги ҳамда қондаги қанд миқдорининг ошиши натижасида вилоят кардиология марказига ётқизилган бўлиб, айни пайтдаги ҳолати яхши. Саломатлиги малакали мутахассислар томонидан назорат қилиб борилмоқда.
Ҳокимни даволовчи шифокорнинг айтишича, юрак аритмияси касаллиги юракнинг қўзғалувчанлик манбаининг бузилиши натижасида юрак частотаси нормаллиги ва мунтазамлигининг ўзгариши ҳисобланади. Аритмия бошланиши билан юрак томирларига қон ўз вақтида етиб келмагани сабабли тартибсиз равишда сиқила бошлайди. Натижада одам исиб кетиш ёки совқотишни ҳис қилиши, юракнинг тез-тез уриши кузатилади. Шунингдек, беморда бош айланиши, тўсатдан онгни йўқотиш, юракдаги оғриқ ёки санчиқлар, бош оғриғи, умумий лоҳаслик, неврологик бузилишлар бўлиб туради.
Аввалроқ, Баҳром Ҳайдаровнинг давлат манфаатларига 1,7 милиард сўм зарар келтирганликда айбланаётгани, унинг депутатлик даҳлсизлигини бекор қилиш учун вилоят прокуратурасига тақдимнома киритилгани хабар қилинган эди. «Дарё» мухбири билан суҳбатлашган ҳоким эса буни инкор этганди.
Изоҳ (0)