Uzbekistan Airways Исроилга ҳафтасига 4 мартагача тўғридан-тўғри янги рейсларни йўлга қўйишни режалаштирмоқда. Бу ҳақда Ўрта Ер денгизи халқаро туризм ярмаркасида компания вакиллари маълум қилди, деб хабар беради Uzbekistan Travel.
Кўргазма доирасида Ўзбекистоннинг Исроилдаги элчихонаси билан ҳамкорликда Ўзбекистон ва Исроил туристик компаниялари ўртасида B2B форматидаги учрашув бўлиб ўтган. Учрашувда Ўзбекистон сайёҳлик компаниялари мамлакат шаҳарларида исроилликлар учун мутлақо янги туристик йўналишларни тақдим этган ва саёҳатларни режалаштириш соҳасида мамлакатлар ўртасидаги алоқаларни ривожлантиришга оид масалаларни муҳокама қилган.
Uzbekistan Airways маълумотларига кўра, авиакомпания Тель-Авивга ҳафтасига икки марта мунтазам рейсларни амалга оширади. Янги рейсларнинг йўлга қўйилиши эса парвозлар частотасини икки баробарга ошириб, ҳафтасига тўрт маротабага етказади.
Тошкент ва Тель-Авив ўртасидаги мунтазам рейслар 2021 йилнинг майидан қайта тикланган. Мамлакатлар ҳар ҳафта чартер рейсларни йўлга қўйишни келишиб олганди. Бироқ июлда рейслар яна бекор қилинганди — Исроил Ўзбекистонни коронавирус билан касалланиш даражаси юқори бўлган давлатлар қаторига қўшган эди.
The International Mediterranean Tourism Market (IMTM) —Исроил туризм саноати учун профессионал кўргазма ва Шарқий Ўрта Ер денгизидаги энг муҳим ва энг йирик туризм ярмаркаси. Ўрта Ер денгизи халқаро туризм бозори-2022 ярмаркасида Озарбайжон, Филиппин, Бразилия, Грузия, Испания, Болгария, Португалия, Хорватия, Литва, Италия, Польша, Словения, Греция — жами 50 дан ошиқ давлатлар иштирок этмоқда.
Изоҳ (0)