Андижон вилоятида 2022 йилнинг биринчи чорагида 12 та ҳолатда ис гази ва ҳаво-газ аралашмаси чақнаши билан боғлиқ нохуш ҳолат қайд қилинган. Оқибатда 9 нафар фуқаро вафот этган, 16 нафар фуқаро эса жабрланган. Бу ҳақда вилоят Фавқулодда вазиятлар бошқармаси масъуллари билан бўлган матбуот анжуманида маълум қилинди, дея хабар бермоқда «Дарё» мухбири.
Фавқулодда вазиятлар бошқармаси бўлими бошлиғи, майор Одилжон Қўлдошевнинг таъкидлашича, 2022 йилнинг ўтган даври мобайнида тўртта ис гази ва саккизта ҳаво-газ аралашмаси чақнаши билан боғлиқ нохуш ҳолат қайд қилинган.
Қўшимча қилинишича, уч ой давомида вилоятда 175 та ҳолатда турли даражадаги ёнғинлар юз берган. Оқибатда етти нафар фуқаро вафот этган, олти нафар фуқаро эса тан жароҳати олган.
«2021 йилда 852 та ҳолатда ёнғин содир бўлиб, ушбу ёнғинлар оқибатида 19 нафар фуқаро тан жароҳати олган, 13 нафар фуқаро эса вафот этган. Бундан ташқари, ўтган йил давомида 31 та чақнаш ҳолати кузатилган бўлиб, 58 нафар фуқаро жароҳат олган. Ис газидан заҳарланиш ҳолатларида эса фуқароларнинг беш нафари жароҳатланган, бир нафар фуқаро эса бевақт ҳаётдан кўз юмган», — дейди масъул.
Матбуот анжуманида айтилишича, нохуш ҳолатлар фуқаролар томонидан газ, кўмир, ўтин ва бошқа шу каби ёқилғилардан фойдаланишда хавфсизлик чораларига риоя этмаслиги, қўлбола ясалган иситиш печлари ва анжомларидан фойдаланиши оқибатида келиб чиқмоқда.
Изоҳ (0)