Озарбайжоннинг биринчи президенти Аяз Муталибов вафот этди

Озарбайжоннинг биринчи президенти Аяз Муталибов 83 ёшида вафот этди, деб хабар бермоқда Азербайcан24.

Қайд этилишича, Муталибов узоқ давом этган касаллик туфайли оламдан ўтган.

Муталибов 1938 йилда Бокуда таваллуд топган. 1963 йилда Совет Иттифоқи Коммунистик партиясига аъзо бўлиб, саноат корхоналарига раҳбарлик қилган. 1979—1982 йилларда Озарбайжон ССР маҳаллий саноат вазири, ундан кейин республика Давлат план қўмитаси раиси ва Озарбайжон ССР Вазирлар Кенгаши раисининг ўринбосари, кейин эса Вазирлар Кенгаши раиси бўлган. 1990 йил май ойида Озарбайжон ССР президенти этиб сайланди. У Совет Иттифоқи Коммунистик партияси марказий қўмитаси, шунингдек, партия Сиёсий бюроси аъзоси эди.

1991 йилда Озарбайжон мустақиллиги эълон қилингандан сўнг мамлакатда бўлиб ўтган илк президентлик сайловларида у ягона номзод бўлди ва 98,5 фоиз овоз тўплади.

Унинг президентлик даврида тан олинмаган Тоғли Қорабоғ республикаси атрофида вазият кескинлашди. Можаро арман ва озарбайжон аҳолиси ўртасидаги қарама-қаршиликка айланиб кетди. Озарбайжон армиясининг ҳудудий йўқотишлари ва муваффақиятсизликлари фонида Аяз Муталибов 1992 йил март ойида истеъфога чиқди.

Бироқ ўшанда президент вазифасини бажарувчи Ёқуб Мамедов вазиятни ўнглай олмади ва 1992 йил май ойида Олий Кенгаш депутатлари Муталибовни лавозимига қайта тиклаш учун овоз берди. Аммо мухолифат босими остида у тез орада президентликдан воз кечди ва мамлакатни тарк этди.

Шундан кейин собиқ президент Москвада яшаган. 2000 йиллар бошида у сиёсий фаолиятга қайтди, Фуқаролик бирлиги партиясини бошқарди, кейин Озарбайжон Социал-демократик партияси ҳамраиси бўлди. Муталибов 2011 йилга келибгина Озарбайжонга қайтиб келганди.