Ижтимоий тармоқларда Чилонзор туманидаги «Катта Олмазор» маҳалласида жойлашган кўп қаватли уйларнинг фасад қисмидаги безакли кафелларнинг усти бўялаётгани ҳақидаги эътирозли фикрлар тарқалди. Туман ҳокимлиги матбуот хизмати ҳолатга муносабат билдириб, кафелларни бўяш ишлари тўхтатилганини маълум қилди.
Хабарларда таъкидланишича, ака-ука Жарскийлар томонидан 9 қаватли уйларнинг фасадига чизилган ноёб мозаикалар бўяб ташланмоқда.
Чилонзор тумани ҳокимлигининг тегишли мутасаддиларидан олинган маълумотларга кўра, маҳалладаги мазкур уйлар қурилганига 40 йилдан ошгани сабабли фасадлардаги мозаикалар ҳам таъмирталаб аҳволга келиб қолган. Шу боис 2022 йил 3 март санасидаги VI-57-50-14-0-К/22-сонли «Тошкент шаҳрида таъмирлаш ва ободонлаштириш ишларини амалга ошириш тўғрисида»ги Халқ депутатлари Тошкент шаҳар кенгаши томонидан қабул қилинган қарор асосида пудратчи ташкилот томонидан маҳалладаги 9 қаватли уйларнинг фасадларида таъмирлаш ишлари бошланган.
«Лекин шу ерда яшовчиларнинг айримларида таъмирлаш ишларига эътироз бўлгани сабабли ҳозирда уйларнинг ён қисмидаги кафелли мозаикаларни бўяш ишлари тўхтатилган. Уйларнинг олд ва орқа қисмларидаги фасадларни таъмирлаш ишлари давом эттирилмоқда», — дейилади муносабатда.
Эслатиб ўтамиз, 2022 йилнинг 18 февралида президент Шавкат Мирзиёев Сергели туманининг «Дўстлик» маҳалласига ташрифи чоғида кўп қаватли уйлардан бирининг деворига чизилган «Дўстлик рамзи» муралига эътибор қаратиб, ранг-тасвирнинг бундай турига ҳам алоҳида ғамхўрлик қилиш зарурлигини таъкидлаганди.
Мавзуга доир:
- «Чизилган асар қанчалик танқидий бўлмасин, ўчирилмаслиги шарт». Тошкент биноларини безаётган мурал ва стрит-арт ижодкорларининг муаммолари ўйлаганимиздан-да кўпми?
- Тошкентдаги кўп қаватли уйлардаги мозаикаларга маданий-тарихий мерос мақоми берилиши мумкин
- Саида Мирзиёева бинолардаги мозаика панноларни сақлаб қолиш ва таъмирлашга чақирди
Изоҳ (0)