Сурхондарё вилоятининг Музробод туманида кредит маблағини ўзлаштирган МЧЖ раҳбари аниқланди, деб хабар беради Бош прокуратура ҳузуридаги департамент.
Маълум қилинишича, департаментнинг Музработ туман бўлими томонидан «Алоқабанк»нинг Сурхондарё ҳудудий маркази мурожаатига асосан терговга қадар текширув ўтказилган. Текширув давомида «Т.Й.Э.» МЧЖ собиқ раҳбари И.С. мазкур корхонага «Алоқабанк» вилоят филиали томонидан «Қишлоқ хўжалиги маҳсулотларини экспорт қилишда айланма маблағни тўлдириш» учун ажратилган 220 минг доллар кредит маблағини ўзининг шахсий эҳтиёжига ишлатиб юбориб, талон-торож қилгани аниқланган.
Шунингдек И.С. банк филиали масъул шахслари билан тил бириктириб, аслида баҳоси 737,8 миллион сўм бўлган бинонинг нархини сунъий равишда оширган ҳолда 2,5 миллиард сўмга ўзаро келишув далолатномасига асосан гаров таъминоти сифатида қўйиб, банк манфаатларига жуда кўп миқдорда зарар етказган.
Мазкур ҳолат юзасидан Жиноят кодексининг 167-моддаси (ўзлаштириш ёки растрата йўли билан талон-торож қилиш), 205-моддаси (ҳокимият ёки мансаб ваколатини суиистеъмол қилиш) билан жиноят иши қўзғатилиб, тергов ҳаракатлари ўтказилмоқда.
Аввалроқ Сирдарёда ўзгалар номига 1,2 млрд сўм кредит расмийлаштирган собиқ банк ходимларига жиноят иши очилгани, Зангиотада 5,9 млрд сўм имтиёзли кредит маблағларини талон-торож қилган раҳбарлар аниқлангани тўғрисида хабар берилганди.
Мавзуга доир:
- Андижонда 527 млн сўм, Сурхондарёда эса 772 млн сўмдан ортиқ маблағни ўзлаштирган ҳисобчилар аниқланди
- Тошкентда ўзи ишлайдиган корхонанинг 160 млн сўмдан ортиқ маблағини талон-торож қилган бош ҳисобчи ушланди
- Сирдарё ва Сурхондарёда жами 4 млрд сўм кредит маблағларини талон-торож қилган раҳбарлар ушланди
Изоҳ (0)