Farg‘ona viloyati Qo‘qon shahar “Hazrati Abbos” masjidi imom-xatibi Saidkamolxon Mahmudov va uning 4 nafar oila a’zosi is gazidan vafot etdi. Bu haqda Musulmonlar idorasi Farg‘ona viloyati vakilligi xabar qildi.

Qayd etilishicha, 21-mart kuni Saidkamolxon Mahmudov o‘zi, turmush o‘rtog‘i va uch nafar voyaga yetmagan farzandlari bilan xonadonida is gazidan zaharlanish oqibatida vafot etgan.

Saidkamolxon domla 2014-yildan buyon Qo‘qon shahridagi “Hazrati Abbos” masjidi imom-xatibi vazifasida ishlab kelayotgandi.

Favqulodda vaziyatlar vazirligining ma’lumot berishicha, ushbu xonadon tabiiy gaz bilan ta’minlangan. Marhumlarning o‘lim sababini aniqlash maqsadida sudga oid tibbiy ekspertiza tayinlangan. Ekspertiza natijalari olingandan so‘ng, qo‘shimcha ma’lumot taqdim etiladi.

“Mutaxassislarning o‘rganishlariga ko‘ra fuqarolar is gazidan zaharlanib vafot etganligi taxmin qilinmoqda. Surishtiruv ishlari olib borilmoqda. Xonadon 18-fevral kuni Qo‘qon ‘Biokiyo’ FVB 30-YOQQ xodimi L.Naziraliyev tomonidan  yong‘in xavfsizligi qoidalariga rioya qilish  yuzasidan yo‘riqnomadan o‘tkazilib, maxsus daftarga imzo qo‘ydirilgan”, — deyiladi xabarda.

Eslatib o‘tamiz, 9-fevral holatiga ko‘ra, 2022-yil boshidan buyon O‘zbekistonda is gazi bilan bog‘liq 21 holatda 19 nafar fuqaro zaharlangan va 36 nafar fuqaro vafot etgan

Avvalroq Samarqandda to‘rt kishining is gazidan zaharlanib vafot etgani yuzasidan jinoyat ishi qo‘zg‘atilgani, Xorazmdagi choyxonada bir oilaning uch a’zosi is gazidan zaharlanib vafot etgani, Kattaqo‘rg‘onda is gazidan oilaviy zaharlanish oqibatida uch nafar bola halok bo‘lgani to‘g‘risida xabar berilgandi.